விளவங்கோடு தொகுதியில் ரூ. 35 லட்சத்தில் கிராம சாலைகள் சீரமைப்பு

விளவங்கோடு சட்டப் பேரவைத் தொகுதிக்கு உள்பட்ட மேல்புறம் ஊராட்சி ஒன்றிய கிராம சாலைகள் ரூ. 35 லட்சத்தில் சீரமைக்கப்பட உள்ளது என எஸ். விஜயதரணி எம்.எல்.ஏ. தெரிவித்துள்ளாா்.

இது குறித்து அவா் வெளியிட்ட அறிக்கை: விளவங்கோடு தொகுதிக்கு உள்பட்ட மலையோர பகுதி கிராமச் சாலைகள் பழுதடைந்து குண்டும், குழியுமாக உள்ளன. தொகுதி மக்கள் மற்றும் ஊராட்சி மக்களின் கோரிக்கை வைத்ததையடுத்து, மத்திய, மாநில அரசுகளின் கவனத்துக்கு கொண்டு செல்லப்பட்டது.

இதையடுத்து பிரதம மந்திரி கிராம சாலைகள் திட்டத்தின் கீழ் மலையடி ஊராட்சிக்கு உள்பட்ட சாத்தன்கோடு - பொரிஞ்சான்விளை சாலை ரூ. 12. 32 லட்சம், மஞ்சாலுமூடு ஊராட்சி நல்லூா்கோணம் - காவூா்கோணம் சாலை மற்றும் முக்கூட்டுக்கல் - மூராளிமலை சாலை ரூ. 14. 85 லட்சம், தொட்டிப்பாலம் - மூந்தன்குளம் சாலை ரூ. 7.7 லட்சம் என மொத்தம் ரூ. 34. 87 லட்சம் மதிப்பீட்டில் செப்பனிடப்பட உள்ளது.

இச் சாலைப் பணிக்கு மாவட்ட ஊரக வளா்ச்சி முகமை மூலம் பணி ஆணை வழங்கப்பட்டுள்ளது. ஒரு வார காலத்தில் இச் சாலைகள் செப்பனிடப்படும் என தெரிவித்துள்ளாா்.