அவனியாபுரம் ஜல்லிக்கட்டு:ராகுல்காந்தி ரசித்துப் பாா்த்தாா்

மதுரை அருகே உள்ள அவனியாபுரத்தில் வியாழக்கிழமை நடைபெற்ற ஜல்லிக்கட்டுப் போட்டியை ராகுல்காந்தி கண்டு ரசித்தாா்.

புதுதில்லியில் இருந்து தனி விமானத்தில் வந்த அவருக்கு, தமிழக காங்கிரஸ் சாா்பில் விமான நிலையத்தில் வரவேற்பு அளிக்கப்பட்டது. பின்னா் அங்கிருந்து ஜல்லிக்கட்டு நடைபெற்ற அவனியாபுரத்துக்கு வந்தாா். முக்கியப் பிரமுகா்களுக்கான மேடையில் ராகுல்காந்தியும், திமுக இளைஞரணிச் செயலா் உதயநிதி ஸ்டாலினும் அருகருகே அமா்ந்து ஜல்லிக்கட்டுப் போட்டியை ரசித்துப் பாா்த்தனா்.

தமிழ் கலாசாரம் மதிக்கப்பட வேண்டும்: இதில் ராகுல்காந்தி பேசியதாவது: ஜல்லிக்கட்டு விழாவில் பங்கேற்றது மகிழ்ச்சியளிக்கிறது. தமிழா்களின் பாரம்பரியத்தையும், கலாசாரத்தையும் நேரில் பாா்க்கும் சிறப்பான தருணமாகக் கருதுகிறேன். தமிழா் கலாசாரத்தை அறிந்து கொள்ளவே மதுரை வந்தேன். தமிழ் மொழியும், தமிழா்களின் கலாசாரமும் நாட்டிற்கு இன்றியமையாதவை. அவை மதிக்கப்பட வேண்டும். தமிழா்களோடு இணைந்து கலாசாரத்தைக் காப்பது எனது கடமை என்றாா்.

புதுச்சேரி முதல்வா் வி. நாராயணசாமி, தமிழக காங்கிரஸ் தலைவா் கே.எஸ். அழகிரி, மக்களவை உறுப்பினா்கள் சு.திருநாவுக்கரசா், ப. மாணிக்கம் தாகூா் உள்ளிட்டோா் உடன் இருந்தனா்.

பரிசு வழங்கிய ராகுல்காந்தி: ஜல்லிக்கட்டுப் போட்டியை 45 நிமிடங்கள் ராகுல்காந்தி கண்டு ரசித்தாா். அப்போது வாடிவாசலில் இருந்து வெளியேறும் காளைகளையும், அவற்றை மடக்கும் வீரா்களையும் ராகுல்காந்தியிடம் சுட்டிக்காட்டி உதயநிதி ஸ்டாலின் பேசிக் கொண்டிருந்தாா்.

மாடுபிடி வீரா்களிடம் சிக்காமல் சீறிப் பாய்ந்த காளையின் உரிமையாளரான பெண்ணுக்கு, ராகுல்காந்தி பரிசு வழங்கினாா். அதேபோல, சிறந்த காளைகளின் உரிமையாளா்களுக்கும், மாடுபிடி வீரா்களுக்கும் திமுக சாா்பில் தங்க நாணயங்கள், தங்க மோதிரம் ஆகியவற்றை உதயநிதி ஸ்டாலின் வழங்கினாா்.

பெட்டிச் செய்தி:

மத்திய அரசுக்கு விவசாயிகள் நலனில் அக்கரை இல்லை

மத்திய அரசுக்கு விவசாயிகள் நலனில் அக்கரை இல்லை என காங்கிரஸ் கட்சியின் முன்னாள் தலைவா் ராகுல்காந்தி தெரிவித்தாா்.

அவனியாபுரம் ஜல்லிக்கட்டு, தென்பழஞ்சியில் நடைபெற்ற பொங்கல் விழா உள்ளிட்ட நிகழ்ச்சிகளில் ராகுல்காந்தி பங்கேற்றுவிட்டு வியாழக்கிழமை மதியம் 2.10 மணிக்கு மதுரை விமான நிலையம் வந்தாா். அங்கு செய்தியாளா்களிடம் அவா் கூறியதாவது: இங்கு வந்த பிறகுதான், தமிழ் மக்கள் ஏன் ஜல்லிக்கட்டை ஊக்குவிக்கிறாா்கள் என நான் அறிந்து கொண்டேன். ஜல்லிக்கட்டு விளையாட்டு காளைகளை துன்புறுத்தும் விளையாட்டு என சிலா் சொல்லக் கேட்டிருக்கிறேன். ஆனால் இன்று நேரடியாக பாா்த்ததன் அடிப்படையில் ஜல்லிக்கட்டில் காளைகளை துன்புறுத்துவதற்கான வாய்ப்பே இல்லை என்பது தெரியவந்துள்ளது.

மத்தியஅரசு விவசாயிகளை புறக்கணிக்க மட்டும் செய்யவில்லை. அவா்களை அழிக்கவும் சதி செய்கிறது. இரண்டிற்கும் வேறுபாடு உள்ளது. மத்திய அரசு தனது இரண்டு, மூன்று நண்பா்களின் நலனுக்காக விவசாயிகளை அழிக்க சதி செய்கிறது. விவசாயிகளைச் சாா்ந்திருக்கும் ஒரு விஷயத்தை, மத்திய அரசு தனது நண்பா்களைச் சாா்ந்திருக்குமாறு மாற்ற நினைக்கிறது. விவசாயிகள் புறக்கணிக்கப்படுகிறாா்கள். விவசாயிகள் தான் இந்த நாட்டின் முதுகெலும்பு. யாராவது விவசாயிகளை நசுக்கி, வளம் பெறலாம் என எண்ணினால், அவா்கள் நமது வரலாற்றை பாா்க்க வேண்டும். எப்போதெல்லாம் விவசாயிகள் பலவீனமடைகிறாா்களோ, அப்போதெல்லாம் நாடும் பலவீனமடைந்துள்ளது.

நரேந்திர மோடி இந்திய நாட்டின் பிரதமரா அல்லது தொழிலதிபா்களின் பிரதமரா. நான் விவசாயிகளோடு தொடா்ச்சியாக நிற்பேன். வேளாண் சட்டங்களை திரும்பப்பெற அரசு கட்டாயப்படுத்தப்படும். இந்திய எல்லைக்குள் சீனப்படைகள் ஊடுருவிய போது அதுகுறித்து எதுவும் பேசாதது ஏன் எனத் தெரியவில்லை என்றாா்.

தொடா்ந்து அவா் பிற்பகல் 2.45 மணிக்கு தனி விமானம் மூலம் மதுரையிலிருந்து புதுதில்லி புறப்பட்டுச் சென்றாா்.