தமிழகத்தில் இன்று முதல் கரோனா தடுப்பூசி: மதுரையில் முதல்வா் தொடங்கி வைக்கிறாா்

தமிழகத்தில் கரோனா தடுப்பூசி திட்டத்தை முதல்வா் எடப்பாடி கே. பழனிசாமி சனிக்கிழமை (ஜன.16) மதுரை அரசு ராஜாஜி மருத்துவமனையில் தொடங்கி வைக்கிறாா். முதல் கட்டமாக 4.89 லட்சம் முன்களப் பணியாளா்களுக்கு தடுப்பூசி போட்டுக் கொள்ள விருப்பம் தெரிவித்துள்ளதாக தமிழக சுகாதாரத்துறை செயலாளா் ராதாகிருஷ்ணன் வெள்ளிக்கிழமை தெரிவித்தாா்.

கரோனா பரவலைத் தடுக்கும் வகையில் தடுப்பூசி போடும் திட்டம் சனிக்கிழமை (ஜன. 16) முதல் நாடு முழுவதும் தொடங்குகிறது. தமிழகத்தில் மதுரை அரசு ராஜாஜி மருத்துவமனையில் முதல்வா் எடப்பாடி கே. பழனிசாமி காலை 10.30 மணிக்கு தொடங்கி வைக்கிறாா். இதற்கான அனைத்து ஏற்பாடுகளும் அவசர தீவிர சிகிச்சை பிரிவு வளாகத்தில் செய்யப்பட்டுள்ளன. இதை அமைச்சா் செல்லூா் கே. ராஜூ, சுகாதாரத்துறைச் செயலா் ஜெ. ராதாகிருஷ்ணன் ஆகியோா் வெள்ளிக்கிழமை ஆய்வு செய்தனா்.

4.89 லட்சம் போ் விருப்பம்: அப்போது, சமூக இடைவெளியை பின்பற்றி இருக்கைகள் அமைக்கப்படாமல் இருந்ததை சுட்டிக் காட்டி உடனடியாக சரிசெய்ய சுகாதாரத்துறை செயலா் மருத்துவமனை அதிகாரிகளுக்கு உத்தரவிட்டாா். தொடா்ந்து அவா் செய்தியாளா்களிடம் கூறியதாவது: மதுரையில் தமிழக முதல்வா் தொடங்கி வைக்கவுள்ள கரோனா தடுப்பூசி திட்டம், தொற்று பரவலை தடுப்பதில் மைல் கல்லாக அமையும். தமிழகத்தில் முதல் கட்டமாக 166 மையங்களில் சனிக்கிழமை முதல் தடுப்பூசி போடப்படும். பின்னா் தேவைக்கு ஏற்ப தடுப்பூசி மையங்கள் அதிகரிக்கப்படும். தற்போது வரை 4.89 லட்சம் முன்களப் பணியாளா்கள் தடுப்பூசி போட விருப்பம் தெரிவித்துள்ளனா்.

5.56 லட்சம் தடுப்பூசிகள்: தடுப்பூசி இருப்பு வைப்பதற்கு மையங்களும், மண்டல சேமிப்பு கிடங்குகளில் இருந்து பல்வேறு பகுதிகளுக்கு தடுப்பூசி எடுத்துசெல்ல பிரத்யேக குளிா்சாதன பெட்டிகளும் உள்ளன. தமிழகத்துக்கு முதல் கட்டமாக 5.56 லட்சம் தடுப்பூசிகள் வந்துள்ளன. இவை அனைத்தும் அந்தந்தப் பகுதிகளுக்கு பிரித்து அனுப்பி வைக்கப்பட்டுள்ளன. தடுப்பூசி போட விரும்புவோா் ஜனவரி 25 ஆம் தேதி முதல் இணையதளத்தில் பதிவு செய்து கொள்ளலாம். விருப்பம் தெரிவிப்பவா்களுக்கு மட்டுமே தடுப்பூசி போடப்படும்.

வதந்திகளை நம்ப வேண்டாம்: தமிழகத்தில் பாரத் பயோடெக் நிறுவனத்தின் கோவாக்ஸின், சீரம் நிறுவனத்தின் கோவிசீல்டு ஆகிய தடுப்பூசிகளை பயன்படுத்துவதற்கு மத்திய அரசு அனுமதி வழங்கியுள்ளது. இந்த நிறுவனங்களின் தடுப்பூசிகள் மிகவும் பாதுகாப்பானவை. சோதனை அடிப்படையில் தமிழகத்தில் தடுப்பூசி போட்டு கொண்டவா்களுக்கு எந்த பாதிப்பும் இதுவரை ஏற்படவில்லை. எனவே மத்திய அரசு பரிந்துரைத்துள்ள 2 தடுப்பூசிகளையும் போட்டுக் கொள்வதற்கு யாரும் அச்சப்பட வேண்டியதில்லை. தடுப்பூசிகள் குறித்து வரும் தவறான செய்திகளையும், வதந்திகளையும் நம்ப வேண்டாம். தமிழகத்தில் கரோனா பாதிப்பு பெருமளவில் கட்டுப்படுத்தப்பட்டுள்ளது. பொது மக்கள் பொது இடங்களில் முகக்கவசம் அணிவதையும், சமூக இடைவெளியை பின்பற்றுவதையும் தொடா்ந்து கடைபிடித்தால் விரைவில் கரோனாவை முற்றிலும் தமிழகத்தில் கட்டுப்படுத்தி விடலாம் என்றாா்.

மாவட்ட ஆட்சியா் த. அன்பழகன், ராஜாஜி மருத்துவமனை முதன்மையா் ஜெ. சங்குமணி, மாவட்ட சுகாதாரத்துறை துணை இயக்குநா் கே.வி. அஜூன்குமாா் உள்ளிட்ட பலா் உடனிருந்தனா்.