ஆசியக் கோப்பை ஹாக்கி: தென் கொரியா வெற்றி

ஆசியக் கோப்பை ஹாக்கியின் இறுதிப் போட்டியில் 4-3 என்ற கோல் கணக்கில் இந்திய அணியை வீழ்த்தி நடப்புச் சாம்பியனான தென் கொரியா அணி வெற்றி பெற்றது.

மலேசியாவின் ஈபோ நகரில் இப்போட்டி ஞாயிற்றுக்கிழமை நடைபெற்றது.

இந்த ஆட்டத்தின் முதல் பாதியில் தென் கொரியா வீரர்கள் 2-0 என்ற முன்னிலையில் இருந்தனர். இடைவேளைக்குப்பின் வெகுண்டெழுந்த இந்திய வீரர்கள் சிறப்பான ஆட்டத்தை வெளிப்படுத்தினர். இதனால், ஆட்டத்துக்கு 6 நிமிடங்களுக்கு முன்வரை இரு அணிகளின் கோல்களும் 3-3 என்ற சமநிலையை அடைந்தது.

ஆனால், தென் கொரியாவின் காங் மூன் கியோன் 68-வது நிமிடத்தில் கோலடித்து அணியை முன்னிலை பெற வைத்தார். இதைத் தொடர்ந்து இந்திய அணி வீரர்களால் கோல் அடிக்க முடியவில்லை. இதனால், இறுதியில் தென் கொரியா அணி 4-3 என்ற கணக்கில் ஆசிய கோப்பையைக் கைப்பற்றியது.

தென் கொரியாவின் இந்த வெற்றியின் மூலம், மலேசிய அணி 12 ஆண்டுகளுக்குப் பிறகு உலகக் கோப்பை ஹாக்கி போட்டிக்கு தகுதி பெற்றது குறிப்பிடத்தக்கது.

உலகக் கோப்பைக்கு தகுதி: ஆசிய கோப்பை போட்டியின் அரையிறுதியில் பாகிஸ்தான் அணி தோற்றதால் இந்திய அணி, நெதர்லாந்தில் நடைபெறவுள்ள உலகக் கோப்பை ஹாக்கி போட்டிக்கு தகுதிபெற்று விட்டது.

ஆனால், ஆசிய கோப்பையை வென்றிருந்தால் உலகக் கோப்பை ஹாக்கி போட்டிக்கு இந்தியா நேரடியாகத் தகுதி பெற்றிருக்கும்.

தற்போது, 2-ம் இடத்தை பிடித்ததால், நவம்பர் மாதம் நடைபெற உள்ள ஓசினியா கோப்பை போட்டி முடியும் வரை இந்தியா காத்திருக்க வேண்டும். அப்போதுதான் உலகக் கோப்பை போட்டியில் இந்தியா பங்கேற்பது குறித்து அதிகாரப்பூர்வ அறிவிப்பு வெளியாகும்.

பாகிஸ்தான் 3-ம் இடம்: 3-ம் இடத்துக்கான ஆட்டத்தில் பாகிஸ்தானும், மலேசியாவும் மோதின.

இதில், பாகிஸ்தான் அணி 3-1 என்ற கோல் கணக்கில் வெற்றி பெற்று வெண்கலப் பதக்கத்தை கைப்பற்றியது.