234 தொகுதிகளுக்கும் பொறுப்பாளர்கள்: கமல் அறிவிப்பு

சட்டப்பேரவையின் 234 தொகுதிகளுக்கும் பொறுப்பாளர்களை நியமித்து மக்கள் நீதி மய்யத்தின் தலைவர் கமல்ஹாசன் அறிவித்துள்ளார்.
இது தொடர்பாக செவ்வாய்க்கிழமை அவர் வெளியிட்டுள்ள அறிக்கை:
மக்களுக்கான அரசியல், மக்களுக்கான கட்சி எனும் கொள்கையுடன் தமிழகத்தின் வளர்ச்சிக்காகவும், தமிழர்களின் ஏற்றத்துக்காகவும் மக்கள் நீதி மய்யம் தொடர்ந்து பணியாற்றி வருகிறது. புதிய மாற்றத்தினை முன்னிறுத்தி தெளிவாகவும், நேர்மையாகவும் தொலைநோக்குப் பார்வையுடனும் ஒவ்வொரு நகர்விலும் தமிழர்களின் நம்பிக்கையைப் பெற்று வளர்ந்து கொண்டிருக்கிறோம். இந்நிலையில் தமிழகத்தில் உள்ள அனைத்துத் தொகுதிகளுக்கும் பொறுப்பாளர்கள் நியமிக்கப்பட்டுள்ளனர். மநீம கட்சியில் வழங்கப்படுவது பதவியல்ல, அது ஒவ்வொருவரின் பொறுப்பு என்பதை உணர்ந்து செயல்பட வேண்டும்.
எனவே, அதை உணர்ந்து கட்சியின் விழியாகவும், செவியாகவும், குரலாகவும் கடமையுணர்வுடன் செயலாற்றிட வேண்டும் என்று அவர் கூறியுள்ளார். மக்கள் நீதி மய்யத்துக்காக 234 சட்டப்பேரவைத் தொகுதிகளுக்கும் 575 -க்கும் மேற்பட்ட பொறுப்பாளர்கள் நியமிக்கப்பட்டுள்ளனர்.