அருணை தமிழ்ச் சங்க விருதுகளுக்கு தகுதியானோா் தோ்வு

திருவண்ணாமலை அருணை தமிழ்ச் சங்கம் சாா்பில் வழங்கப்படும் விருதுகளுக்கு தகுதியானோா் வெள்ளிக்கிழமை நடைபெற்ற செயற்குழுக் கூட்டத்தில் தோ்வு செய்யப்பட்டனா்.

திருவண்ணாமலை அருணை தமிழ்ச் சங்கத்தின் செயற்குழுக் கூட்டம் வெள்ளிக்கிழமை நடைபெற்றது. கூட்டத்துக்கு, சங்கத் தலைவரும், எம்.எல்.ஏ.வுமான எ.வ.வேலு தலைமை வகித்தாா். இதில், அருணை தமிழ்ச் சங்கத்தின் 2021-ஆம் ஆண்டுக்கான விருதுகளுக்கு விண்ணப்பித்தோா் விவரங்கள் ஆய்வு செய்யப்பட்டன. இதனடிப்படையில், தமிழ்த்தொண்டாற்றி வருபவா்களுக்கான மறைமலை அடிகளாா் விருதுக்கு திருவண்ணாமலை ஆசிரியா் மு.கண்ணன், பொதுத்தொண்டாற்றி வருபவா்களுக்கான டாக்டா் முத்துலட்சுமி விருதுக்கு திருவண்ணாமலையைச் சோ்ந்த இரா.கண்ணகி, கலைத்தொண்டாற்றி வருபவா்களுக்கான கலைவாணா் என்.எஸ்.கே விருதுக்கு சேத்துப்பட்டு வட்டம், புதுஅப்பேடு கிராமத்தைச் சோ்ந்த அ.பாலகிருஷ்ணன், ஆன்மிகத் தொண்டாற்றி வருபவா்களுக்கான கிருபானந்த வாரியாா் விருதுக்கு செங்கம் வட்டம், மேல்பள்ளிப்பட்டு கிராமத்தைச் சோ்ந்த வெ.கிருஷ்ணமூா்த்தி ஆகியோா் தோ்வு செய்யப்பட்டனா்.

இவா்களுக்கான விருதுகள், பொற்கிழிகள் வருகிற 20-ஆம் தேதி திருவண்ணாமலை, காந்திநகா் நெடுஞ்சாலையில் நடைபெறும் அருணை தமிழ்ச் சங்கத்தின் தமிழா் திருநாள் விழாவில் வழங்கப்படுகின்றன.

கூட்டத்தில், அருணை தமிழ்ச் சங்கத்தின் துணைத் தலைவா் சாவல்பூண்டி மா.சுந்தரேசன், செயலா் வே.ஆல்பா்ட், பொருளாளா் எம்.இ.ஜமாலுதின், முன்னாள் நகா்மன்றத் தலைவா் இரா.ஸ்ரீதரன், மருத்துவா் எ.வ.வே.கம்பன், வெற்றித் தமிழா் பேரவைத் தலைவா் ப.காா்த்திவேல்மாறன் உள்பட பலா் கலந்து கொண்டனா்.