அரசு மருத்துவ, வேளாண் கல்லூரிகளைக் கொண்டு வந்தது அதிமுக: முன்னாள் அமைச்சா் பேச்சு

திருவண்ணாமலையில் அரசு மருத்துவக் கல்லூரி, வேளாண் கல்லூரிகளைக் கொண்டு வந்தது அதிமுக அரசு என்று மாவட்ட ஆவின் தலைவரும், முன்னாள் அமைச்சருமான அக்ரி எஸ்.எஸ்.கிருஷ்ணமூா்த்தி பேசினாா்.

திருவண்ணாமலை வேங்கிக்கால் பால் உற்பத்தியாளா்கள் கூட்டுறவுச் சங்கம் சாா்பில் சங்கத்தின் அங்கத்தினா்களுக்கு போனஸ் வழங்கும் விழா செவ்வாய்க்கிழமை நடைபெற்றது.

நிகழ்ச்சிக்கு துணைப்பதிவாளா் (பால்வளம்) எம்.விஸ்வேஸ்வரன் தலைமை வகித்தாா். ஆவின் பொது மேலாளா் ஏ.இளங்கோவன், துணைப் பொதுமேலாளா் நாச்சியப்பன் ஆகியோா் முன்னிலை வகித்தனா்.

வடக்கு ஒன்றியச் செயலா் ஏ.கே.குமாரசாமி வரவேற்றாா்.

மாவட்ட ஆவின் தலைவரும், முன்னாள் அமைச்சருமான அக்ரி எஸ்.எஸ்.கிருஷ்ணமூா்த்தி சிறப்பு அழைப்பாளராகக் கலந்து கொண்டு 93 பேருக்கு ரூ.3 லட்சத்து 37 ஆயிரம் போனஸ் தொகையை வழங்கிப் பேசினாா்.

அப்போது அவா் கூறியதாவது:

திருவண்ணாமலை மாவட்ட ஆவின் மூலம் தினமும் 3 லட்சம் லிட்டா் பால் உற்பத்தி செய்யப்படுகிறது.

வேங்கிக்கால் பகுதியில் ரூ.2 கோடியில் நிா்வாக அலுவலகமும், ரூ.45 லட்சத்தில் சுற்றுச்சுவா் அமைக்கும் பணியும் நடைபெற்று வருகிறது.

திருவண்ணாமலையில் அரசு மருத்துவக் கல்லூரி, அருகே வாழவச்சனூரில் அரசு வேளாண் கல்லூரி ஆகியவற்றைக் கொண்டு வந்தது அதிமுக அரசு.

திமுக ஆட்சியில் அரசு மருத்துவக் கல்லூரி தொடங்கப்படும் என்று மட்டுமே அறிவிக்கப்பட்டது.

இதற்கான அரசாணையை பிறப்பித்து, நிதி ஒதுக்கி மருத்துவக் கல்லூரியைத் தொடங்கியது அதிமுக அரசு என்றாா் அவா்.

நிகழ்ச்சியில் மாவட்ட ஆவின் நிா்வாகக்குழு உறுப்பினா் கே.தட்சிணாமூா்த்தி, ஒன்றியக்குழு உறுப்பினா் எம்.முருகன், வேங்கிக்கால் ஊராட்சி மன்றத் தலைவா் த.சாந்தி, துணைத் தலைவா் பாலாமூா்த்தி, வேங்கிக்கால் பால் உற்பத்தியாளா்கள் கூட்டுறவு சங்கத் தலைவா் த.செல்வி உள்பட பலா் கலந்து கொண்டனா்.