முக்கிய வெளியுறவுத்துறை பதவியில் இந்திய-அமெரிக்கரை நியமிக்க பரிந்துரை

அமெரிக்காவில், அரசியல் ராணுவ விகாரங்களுக்கான வெளியுறவுத் துணைச் செயலாளர் பதவிக்கு இந்திய-அமெரிக்கரான புனீத் தல்வாரை அதிபர் ஒபாமா பரிந்துரை செய்துள்ளார்.

இவர் கடந்த நான்கு ஆண்டுகளாக மத்தியக் கிழக்குப் பகுதிகள் குறித்த விவகாரங்களில் அதிபர் ஒபாமாவுக்கு ஆலோசகராகப் பணியாற்றி வருகிறார்.

துணைச் செயலாளர் பதவிக்கு ஒபாமாவால் பரிந்துரை செய்யப்படும் இரண்டாவது இந்திய-அமெரிக்கர் இவர் என்பது குறிப்பிடத்தக்கது. நிஷா தேசாய் பிஸ்வால் என்ற இந்திய-அமெரிக்கரை தெற்கு மற்றும் மத்திய ஆசிய விவகாரங்களுக்கான வெளியுறவுத்துறை துணைச் செயலாளர் பதவிக்கு ஒபாமா ஜூலை மாதம் பரிந்துரைத்தார். அமெரிக்க நாடாளுமன்றத்தின் ஒப்புதல் சிடைத்தவுடன், இவ்விருவரும் இப்பதவிகளில் அமர்த்தப்படுவர்.

அரசியல் ராணுவ விவகாரங்களுக்கான வெளியுறவுத் துணைச் செயலாளர் பதவியில் அமர்த்தப்பட்டால், சர்வதேசப் பாதுகாப்பு, ராணுவ நடவடிக்கைகள், பாதுகாப்புத் திட்டங்கள், பாதுகாப்புத் தளவாட வர்த்தகம் போன்றவை தொடர்பான கொள்கைகளை வகுப்பதில் புனீத் தல்வார் வழிகாட்டுவார்.