வங்கதேசம்: கலீதாவுக்கு ஏப்.22 வரை ஜாமீன் நீட்டிப்பு

ஊழல் வழக்கில் சிறைத் தண்டனை பெற்றுள்ள வங்கதேச முன்னாள் பிரதமர் கலீதா ஜியாவுக்கான ஜாமீனை, வரும் 22-ஆம் தேதி வரை அந்த நாட்டு நீதிமன்றம் வியாழக்கிழமை நீட்டித்தது.
வெளிநாடுகளிலிருந்து முறைகேடாக நன்கொடை பெற்ற வழக்கில் 5 ஆண்டுகள் சிறைத் தண்டனை விதிக்கப்பட்டிருந்த முன்னாள் பிரதமர் கலீதா ஜியாவுக்கு வழங்கப்பட்டுள்ள ஜாமீனை நீட்டிக்குமாறு அவரது வழக்குரைஞர் சிறப்பு நீதிமன்றத்தில் மனு தாக்கல் செய்திருந்தார்.
இதுதொடர்பான விசாரணையை வியாழக்கிழமை மேற்கொள்ள கடந்த மாதம் 28-ஆம் தேதி நீதிமன்றம் முடிவு செய்தது.
இந்த நிலையில், குறிப்பிட்டபடி கலீதா ஜியாவின் மனுவை வியாழக்கிழமை பரிசீலித்த நீதிபதி முகமது அக்தாருஸமான், ஜியாவுக்கான ஜாமீனை நீட்டித்து உத்தரவிட்டார்.
மேலும், வரும் 22-ஆம் தேதிக்குள் கலீதா ஜியாவை நீதிமன்றத்தில் ஆஜர்படுத்தும்படியும் அவர் உத்தரவிட்டார்.
'ஜியா ஆதரவற்றோர் அறக்கட்டளை'க்காக வெளிநாடுகளிலிருந்து 2.10 கோடி டாலரை (சுமார் ரூ.1.6 கோடி) முறைகேடாகப் பெற்றதாக, முன்னாள் பிரதமர் கலீதா ஜியா (72), அவரது மகன் தாரிக் ரஹ்மான் உள்ளிட்ட 6 பேருக்கு எதிராக டாக்காவிலுள்ள விசாரணை நீதிமன்றத்தில் வழக்கு நடைபெற்று வந்தது.
கலிதா ஜியாவின் கணவரும், வங்கதேசத்தின் முன்னாள் ராணுவ ஆட்சியாளர் மற்றும் அதிபருமான ஜியாவுர் ரஹ்மானின் பெயரிடப்பட்ட அந்த அறக்கட்டளை, ஏட்டளவில் மட்டுமே இயங்கி வந்ததாகக் கூறப்படுகிறது.
இந்த நிலையில், கடந்த 6 ஆண்டுகளுக்கும் மேலாக இந்த விவகாரம் தொடர்பாக நடைபெற்று வந்த வழக்கில் கலீதா ஜியாவுக்கு கடந்த பிப்ரவரி மாதம் 8-ஆம் தேதி 5 ஆண்டுகள் சிறைத் தண்டனை விதித்து நீதிமன்றம் தீர்ப்பளித்தது. 
மேலும், தலைமறைவாகியுள்ள அவரது மகனும், வங்கதேச தேசியவாதக் கட்சியின் துணைத் தலைவருமான தாரிக் ரஹ்மான் மற்றும் குற்றம் சாட்டப்பட்டுள்ள 5 பேருக்கு 10 ஆண்டு கடுங்காவல் சிறைத் தண்டனை விதிக்கப்பட்டது.