நடிகர் விவேக்கின் உடல் காவல்துறை மரியாதையுடன் தகனம் செய்யப்பட்டது.
மாரடைப்பால் சென்னையிலுள்ள தனியார் மருத்துவமனையில் அனுமதிக்கப்பட்டிருந்த நடிகர் விவேக் இன்று அதிகாலை 4.35 மணியளவில் சிகிச்சை பலனின்றி உயிரிழந்தார்.
விவேக்கின் மறைவுக்குத் திரையுலகினரும் ரசிகர்களும் நேரில் வந்து அஞ்சலி செலுத்தினார்கள். விவேக்கின் உடலுக்கு மக்கள் ஏராளமாகத் திரண்டு கண்ணீர் மல்க அஞ்சலி செலுத்தினார்கள்.
இன்று மாலை சென்னை விருகம்பாக்கம் வீட்டில் இருந்து நடிகர் விவேக்கின் இறுதி ஊர்வலம் தொடங்கியது. இறுதி ஊர்வலத்தில் திரையுலகினர், நண்பர்கள், பொதுமக்கள் என ஏராளமானோர் பங்கேற்றார்கள்.
மேட்டுக்குப்பம் மின்மயானத்தில் விவேக் உடல் காவல்துறை மரியாதையுடன் தகனம் செய்யப்பட்டது. விவேக்கின் உடலுக்குக் குடும்பத்தினர் இறுதிச்சடங்கு செய்தார்கள். 72 துப்பாக்கிக் குண்டுகள் முழங்க காவல்துறையினர் மரியாதை செலுத்தினார்கள். 24 காவலர்கள் 3 முறை வானத்தை நோக்கி துப்பாக்கியால் சுட்டு மரியாதை செலுத்தினார்கள்