'மாஸ்டர்' படத்தின் வெற்றிக்கு பிறகு கமல்ஹாசன் நடிக்கும் 'விக்ரம்' படத்தை லோகேஷ் கனகராஜ் இயக்கி வருகிறார். இந்தப் படத்தை கமல்ஹாசன் தனது ராஜ்கமல் ஃபிலிம்ஸ் இண்டர்நேஷனல் சார்பாக தயாரித்து வருகிறார்.
இயக்குநர் லோகேஷ் கனகராஜ் ஒரு வெறித்தனமான கமல்ஹாசன் ரசிகர். அவரது 'மாநகரம்' படத்தில் சந்தீப் கிஷன் வேடத்தை கமல்ஹாசனின் சத்யா படத்தை அடிப்படையாகக் கொண்டு வடிவமைத்ததாகவும், 'கைதி' படத்தை 'விருமாண்டி' படத்தின் பாதிப்பில் உருவாக்கியதாகவும் அவரே தெரிவித்திருக்கிறார். மேலும் விஜய் நடித்த 'மாஸ்டர்' படம் கூட கமல்ஹாசனின் 'நம்மவர்' படத்தின் பாதிப்பில் உருவானது தானாம்.
ரஜினிகாந்த்தை வைத்து அவரது ரசிகர் கார்த்திக் சுப்புராஜ் இயக்கிய 'பேட்ட' திரைப்படம் எப்படி பெரும் வெற்றி பெற்றதோ, அதே போல லோகேஷ் இயக்கும் விக்ரம் படமும் வெற்றி பெறும் என்பது ரசிகர்களின் கணிப்பாக இருக்கிறது. அதற்கேற்றார் போலவே 'விக்ரம்' படத்தின் டீசரும் அமைந்திருந்தது. ஆரம்பிக்கலாங்கலா? என டீசரில் கமல் பேசிய ஒற்றை வசனம் மிக பிரபலமானது.
இந்த நிலையில் இந்தப் படத்தில் பிரபல மலையாள நடிகர் செம்பன் வினோத் முக்கிய வேடத்தில் நடிக்கிறார். இவர் ஏற்கனவே தமிழில் 'கோலி சோடா 2' படத்தின் மூலம் பிரபலமாகியிருந்தார். மலையாளத்தில் 'ஜல்லிக்கட்டு', 'ஈ.மா.யூ', 'சார்லி' போன்ற பல படங்களில் இவரது நடிப்பு பாராட்டப்பட்டது. அவர் தற்போது 'விக்ரம்' படத்தில் இணைந்திருப்பது ரசிகர்களுக்கு மகிழ்ச்சியை ஏற்படுத்தியுள்ளது.
'விக்ரம்' படத்தில் ஏற்கனவே விஜய் சேதுபதி, ஃபகத் ஃபாசில், 'அஞ்சாதே' நரேன், காளிதாஸ் ஜெயராம், ஷிவானி, மைனா நந்தினி என ஒரு பெரும் நட்சத்திர பட்டாளமே நடித்து வருகின்றனர். அனிருத் இந்தப் படத்துக்கு இசையமைக்க, சர்கார் போன்ற படங்களுக்கு ஒளிப்பதிவு செய்த கிரிஸ் கங்காதரன் ஒளிப்பதிவு செய்கிறார்.