முகநூல் பதிவுகளைத் தொடர்ந்து பிரதீப் ரங்கநாதனின் டிவிட்டர் பதிவுகளும் வைரலாகி வருகின்றன.
கல்பாத்தி எஸ்.அகோரம், கல்பாத்தி எஸ்.கணேஷ், கல்பாத்தி எஸ்.சுரேஷ் ஆகியோர் தயாரிப்பில் உருவாகியுள்ள திரைப்படம் லவ் டுடே. ‘கோமாளி’ புகழ் பிரதீப் ரங்கநாதன் இந்தத் திரைப்படத்தை இயக்கி நாயகனாக நடித்துள்ளார்.
இளைய தலைமுறையினர் மத்தியில் மிகப்பெரிய வரவேற்பைப் பெற்ற இத்திரைப்படம் இதுவரை ரூ.50 கோடிக்கும் அதிகமாக வசூல் செய்து அசத்தி வருகிறது.
இப்படத்திற்கு யுவன் சங்கர் ராஜா இசையமைத்திருந்தார். அவரின் பாடல்களும் பின்னணி இசையும் லவ் டுடே வெற்றிக்கு பலமாக அமைந்தன.
இந்நிலையில், பிரதீப் ரங்கநாதன் முகநூல் பக்கத்தை ஆராய்ந்த ரசிகர் ஒருவர் கடந்த 2010 ஆம் ஆண்டு பிரதீப் இசையமைப்பாளர் யுவனைக் குறிப்பிட்டு ‘யுவன் ஒரு தண்டம், ஃப்ராடு’ என திட்டி பதிவிட்டதை பகிர்ந்திருக்கிறார். அதனைத் தொடர்ந்து, இணையவாசிகள் பிரதீப் ரங்கநாதனை கடுமையாக விமர்சித்து வருகின்றனர்.
மேலும், யுவனின் மங்காத்தா பின்னணி இசை காப்பியடிக்கப்பட்டது என்கிற யூடியூப் விடியோ ஒன்றையும் பகிர்ந்துள்ளார்.
லவ் டுடே படத்தில் நாயகனின் வீட்டில் யுவன் புகைப்படம் மாட்டப்பட்டிருப்பதும் படத்தின் வெற்றிக்குப் பின் ‘யுவன் என் படத்திற்கு இசையமைப்பார் என நான் கனவில் கூட நினைத்ததில்லை’ என பிரதீப் தெரிவித்திருந்ததும் குறிப்பிடத்தக்கது.
இந்நிலையில், பிரதீப் ரங்கநாதனின் பழைய டிவிட்டர் பதிவுகள் வேகமாக பகிரப்பட்டு வருகின்றன. அதில், தான் இயக்கிய குறும்படத்தை நடிகர்கள் சாந்தனு, ஜீவா, விவேக் இயக்குநர்கள் ராம், வெங்கட் பிரபு, கௌதம் மேனன் உள்ளிட்ட பலரிடம் பகிர்ந்து ‘உங்களுக்கு பிடித்திருந்தால் இதைப் பகிர முடியுமா’ என தனக்கான வாய்ப்பை தேடிச் செல்லும் வகையில் பதிவிட்டுள்ளார்.
இதைப் பகிர்ந்த சில ரசிகர்கள் ‘எல்லாரிடமும் நல்ல விசயங்களும் கெட்டதும் உண்டு. எப்போதோ செய்த தவறுக்காக வளர்ந்த பின் ஒருவரை தாக்குவது சரியல்ல’ என கருத்துத் தெரிவித்து வருகின்றனர்.
இணையவாசிகள் இந்த டிவிட்களையும் கவனிக்கலாமே..!
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.