பாண்டியன் ஸ்டோர்ஸ் தொடரில் முக்கிய கதாபாத்திரத்தில் நடித்த சுஜிதாவின் புதிய தொடர் குறித்த தகவல் வெளியாகியுள்ளது.
பாக்யராஜின் முந்தானை முடிச்சு திரைப்படத்தில் குழந்தை நட்சத்திரமாக அறிமுகமானவர் நடிகை சுஜிதா. தொடர்ந்து, நடிகர் சத்யராஜுடன் மந்திர புன்னகை படத்தில் நடித்து ரசிகர்கள் மத்தியில் பிரபலமானார். அப்படத்தில் அவர் பேசும் 'லாலா லாலா' என்ற வசனம் இன்றளவும் பேசப்படுகிறது.
தொடர்ந்து பூவிழி வாசலிலே, மனிதன், காதல் பரிசு, பேர் சொல்லும் பிள்ளை என குழந்தை நட்சத்திரமாக நிறைய படங்களில் நடித்திருந்தார்.
இவர் தூர்தர்ஷனில் ஒளிபரப்பான ஒரு பெண்ணின் கதை என்ற தொடர் மூலம் சின்னத்திரையில் நுழைந்தார். தொடர்ந்து கங்கா யமுனா சரஸ்வதி, கணவருக்காக, மருதாணி, பைரவி, பாண்டியன் ஸ்டோர்ஸ் உள்ளிட்ட தொடர்களில் நடித்தார்.
பாண்டியன் ஸ்டோர்ஸ் தொடரில் தனம் என்ற பிரதான கதாபாத்திரத்தில் நடித்து பலதரப்பட்ட ரசிகர்களைக் கவர்ந்தார் சுஜிதா. மேலும், இவர் பாண்டியன் ஸ்டோர்ஸ் தொடருக்காக விஜய் டிவி வழங்கிய விருதை இரு முறை பெற்றுள்ளார்.
இந்த நிலையில், இவர் கலைஞர் தொலைகாட்சியில் புதிதாக ஒளிபரப்பாகவுள்ள கெளரி என்ற தொடரில் இணைந்துள்ளார். மீண்டும் புதிய தொடரில் நடிக்கவுள்ள சுஜிதாவிற்கு அவரது ரசிகர்கள் வாழ்த்துகளைத் தெரிவித்து வருகின்றனர்.