வந்தியத்தேவனுடன் பிஎஸ் -2 குழு! இது பொன்னியின் செல்வனல்ல, பாண்டியன் ஸ்டோர்ஸ் -2

பாண்டியன் ஸ்டோர்ஸ் -2 தொடரில் நடித்துவரும் குழுவினரை நடிகர் கார்த்தி சந்தித்து வாழ்த்து தெரிவித்தார். கார்த்தியுடன் எடுத்துக்கொண்ட புகைப்படத்தை சமூகவலைதளத்திலும் பகிர்ந்துள்ளனர்.

விஜய் தொலைக்காட்சியில் திங்கள் முதல் சனிக்கிழமை வரை இரவு 8 மணிக்கு பாண்டியன் ஸ்டோர்ஸ் -2 தொடர் ஒளிபரப்பாகி வருகிறது. இந்தத் தொடரில் ஸ்டாலின் முத்து, நிரோஷா, விஜே கதிர்வேல் கந்தசாமி, வசந்த், ஆகாஷ், ஷாலினி உள்ளிட்ட பலர் நடித்து வருகின்றனர்.

பாண்டியன் ஸ்டோர்ஸ் முதல் பாகம் அண்ணன் - தம்பிகளின் பாசத்தை மையமாகக் கொண்டது. 5 ஆண்டுகள் வரை ஒளிபரப்பாகி பெரும் வரவேற்பைப் பெற்றது.

அதனைத் தொடர்ந்து தந்தை - மகன்களின் பாசத்தை அடிப்படையாக வைத்து பாண்டியன் ஸ்டோர்ஸ் -2 தொடர் எடுக்கப்பட்டு வருகிறது.

இந்தத் தொடரின் படபிடிப்பு தளத்தில் சினிமா நடிகர் கார்த்தி வருகை புரிந்து, நடிகர்களை பாராட்டியுள்ளார். சினிமா படப்பிடிப்பு நடந்தபோது தற்செயலாக பாண்டியன் ஸ்டோர்ஸ் -2 தொடரின் படப்பிடிப்பு தளத்தில் நடிகர்களை சந்தித்துள்ளார்.

மேலும் கார்த்தியுடன் நடிகர்கள் ஸ்டாலின் முத்து, ஆகாஷ், ராஜ்குமார், ஷாலினி உள்ளிட்ட பலர் புகைப்படம் எடுத்துக்கொண்டனர். இப்படம் சமூக வலைதளத்தில் அதிகம் பகிரப்பட்டு வருகிறது.