உடல் நலம்
நம்மில் பலர் வியாதி வராமல் நல்ல உடல்நலத்துடன் இருக்கிறோம் என்று நம்பிக்கொண்டு இருக்கிறோம். உண்மை அதுவல்ல. உடல்நலம் என்பது ஓர் உயிரியல் அமைப்பின் நல்ல செயல்பாடு. ஆற்றலை உள்வாங்கி, அதனை மாற்றி, இடத்திற்குத் தகுந்தபடி அவற்றைச் சரியாகப் பிரித்துக் கொடுத்து, பயன்படுத்தி அதன்மூலம் அதிகபட்ச செயல்திறனை பயன்படுத்தும் திறமையே நல்ல உடல் நலம் ஆகும்.
உலக நல நிறுவனத்தின் கருத்து
உலக சுகாதார அமைப்பு (WHO) உடல்நலம் பற்றி 1948ன் அமைப்பு விதியின்படி கூறுவது "உடல்நலம் என்பது ஒருவரின் முழுமையான உடல், மனம் மற்றும் சமூக நல வாழ்வே; வெறுமனே நோய் மற்றும் பலவீன நிலையை எட்டாமல் இருப்பது மட்டும் அல்ல" என்றும் தெளிவாகக் கூறுகிறது. நலம் என்பதின் மிக முக்கியக் காராணியாக இருப்பது சமூக மற்றும் பொருளாதாரச் சூழ்நிலைகள், உடல்நிலை, தனி மனிதச் செயல்பாடு ஆகியவை ஆகும்.
நலம் நிர்ணயிக்கும் காரணிகள்
நலம், சமூகத்தின் பல்வேறு கூறுகளால் தீர்மானிக்கப்படுகிறது. உயிரியல், சூழலியல், வாழ்வியல் சமூக, பொருளாதாரக் காரணிகள் ஒருவரின், அவர் சார்ந்த சமூகத்தின் நலத்தைத் தீர்மானிக்கிறது. ஒருவர் உணவு, உடற்பயிற்சி, கல்வி, உறவுகள், சமூகத் தொடர்புகள், வீட்டு வேலைச் சூழல், மருத்துவச் சேவைகள், பண்பாடு, பழக்கவழக்கங்கள் எனப் பல நுண்ணியக் கூறுகள் ஒருவரின் நலத்தைத் தீர்மானிக்கின்றன. அதனால் நலம் என்பதை நோய், நோயை குணப்படுத்தல் என்ற குறுகிய வரையறைக்குள் விளக்க முடியாது.
அரசியல் சாசனம் சொல்வது
உடல் நலம் என்றால், உடல் மற்றும் உள்ளம் சார்ந்ததுதான் என அடிப்படை உரிமையில் கூறப்பட்டுள்ளது. அதுதான் உயிர் வாழ்தலில் அடிப்படை பங்கேற்பும். இதில் உடல் நலம், சமூக சீர்த்திருத்தங்கள் அரசியல் வாய்ப்பு, பொருளாதார வாய்ப்பு மற்றும் பாலின பாகுபாடு போன்ற சமூக காரணிகளை உள்ளடக்கியதே.
கரோனாவும் உடல்நலமும் சுவாசக்குழாயும்
கரோனா வந்து உலகையே ஆட்டிப்படைத்துக் கொண்டிருக்கும் காலத்தில் எல்லோரும் உடல்நலத்தை நினைக்க வேண்டிய மற்றும் பாதுகாக்க வேண்டிய சூழலுக்குத் தள்ளப்பட்டுள்ளோம். நோயெதிர்ப்பு சக்தி உள்ளவர்கள் மட்டுமே இந்த கொள்ளை நோய் கரோனாவின் கொலைப் பிடியிலிருந்து தப்பித்து உள்ளனர் எனலாம். கொவைட்19 என்று சொல்லப்படும் கரோனா, முக்கியமாக சுவாச மண்டலத்தைப் பாதிக்கும் நோயாகும். கரோனா, மேல் சுவாசக்குழாய் (சைனஸ்கள், மூக்கு மற்றும் தொண்டை) மற்றும் கீழ் சுவாசக்குழாய் (காற்றுக்குழாய் மற்றும் நுரையீரல்) ஆகியவற்றைப் பாதிக்கும்.
இதையும் படிக்க | குறைந்து வரும் வேகம்: புவி சுற்றுவதை நிறுத்திவிட்டால் என்ன ஆகும்?
கரோனாவும் நுரையீரலும்
கரோனா பாதிப்பு ஏற்பட்ட மக்களில் 5% பேருக்கு நுரையீரல் சுவர் மற்றும் அதிலுள்ள காற்று சிற்றறைகளின் உட்சுவரை மோசமாகப் பாதிக்கிறது. உடல் நோய்க்கிருமியுடன் போராடிக்கொண்டிருக்கும்போது, நுரையீரல் வீங்கி, காற்று சிற்றறைகள் நீரால் (ரத்த தந்துகிகள் உடைவதால் ரத்தத்திலிருந்து நீர் வெளியேறி) நிரம்பி விடுகின்றன. இதனால் உடலுக்குள் உள்ள கரியுமில வாயு, காற்று சிற்றறை வழியே வெளியேறவோ, உடல் ஆக்சிஜனைப் பெறவோ முடிவதில்லை. இந்த நிலை நிமோனியா எனப்படும். இது அதிகரிக்கும்போது, காற்றறைகள் உள்ளுக்குள் வந்த ரத்த தந்துகிகளின் கசிவால், நீர் நிரம்பி நிற்கும். காற்றறைகள் அடைபட்டு ஆக்சிஜன் உள்ளுக்குள் வரமுடியாமல் மூச்சுத் திணறல்/சுவாசிப்பதில் சிக்கல் ஏற்பட்டு, சுவாசம் நின்று போகும். இதற்கு நுரையீரல் செயலிழப்பு என்று பெயர்.
சுவாசமும் நுரையீரலும்
நாம் பிறந்ததிலிருந்தே, உள்ளேயும் வெளியேயும் சுவாசிக்கிறோம். ஒற்றை உயிரணு அமீபா முதல் பல செல் விலங்குகள் வரை ஒவ்வொரு உயிரினமும் சுவாசிக்கிறது. நுரையீரல் என்பது மனித சுவாச மண்டலத்தின் சிறப்பு பகுதி. இது நம் வாழ்வின் கடைசி கணம் வரை தொடர்ந்து செயல்படுகிறது. மூளை, இதயம் மற்றும் பிற உறுப்புகளைப் போலவே, மனிதர்கள் மற்றும் திமிங்கலங்கள், டால்பின்கள், தவளைகள், பறவைகள், ஊர்வன மற்றும் பிற விலங்குகளிலும் நுரையீரல் முக்கிய பங்கு வகிக்கிறது. மற்ற விலங்குகள் மற்றும் பறவைகளுடன் ஒப்பிடும்போது, மனிதர்களான நமக்கு சிறப்பு நுரையீரல் உள்ளது.
நுரையீரல்
நமக்கு ஒரு ஜோடி நுரையீரல்கள் உள்ளன.அவை மெல்லிய சவ்வுகள் மற்றும் மூச்சுக்குழாய்கள் எனப்படும் சிறிய குழாய்களால் கட்டமைக்கப்பட்டுள்ளன. இங்கே காற்று சிற்றறைகள் (alveoli) எனப்படும் பலூன் போன்ற அமைப்பு மற்றும் ரத்த நுண்குழாய்களின்/தந்துகிகளின் வலையமைப்பையும் உள்ளடக்கியது. இவை வாயுக்களின் பரிமாற்றத்திற்காக நுரையீரலின் பரப்பளவை அதிகரிக்கிறது.
காற்றறையும் வாயுப் பரிமாற்றமும்
நுரையீரல்கள் தொண்டைக் குழிக்கு கீழே மார்புக்கூட்டுக்குள் பாதுகாப்பாக வைக்கப்பட்டுள்ளன. அவை மென்மையான, பஞ்சு போன்ற மீள் உறுப்புகள் ஆகும். அவை ப்ளூரா எனப்படும் மெல்லிய சவ்வால் இணைக்கப்பட்டுள்ளன.
நுரையீரல் மூச்சுக்குழாய் எனப்படும் சிறிய கட்டமைப்பாக பிரிக்கப்பட்டுள்ளது. அவை மூச்சுக்குழாய்கள் காற்று சிற்றறைகள் (Alveoli) எனும் அமைப்பில் முடிகிறது. இவையே நுரையீரலுக்கு அதிக பரப்பைத் தருகிறது. மேலும் இவைதான் நுரையீரலுக்குள் ஆக்சிஜன்-கரியுமில வாயுக்களின் பரிமாற்றத்தை அதிகரிக்கின்றன .
நுரையீரல் பற்றிய சுவையான உண்மைகள்
இதையும் படிக்க | உங்கள் வாழ்க்கையை மாற்றக்கூடிய புதிய வாழ்முறை