நெசவாளர்களுக்கு ரூ. 10 லட்சம் காப்பீடு: விஜய் வாக்குறுதி

நெசவாளர் குடும்பங்களுக்கு ரூ. 10 லட்சம் வரை காப்பீடு வழங்கப்படும் என தமிழக வெற்றிக் கழக தலைவர் விஜய் வாக்குறுதி அளித்துள்ளார்.

நெசவாளர் முதியோர் ஓய்வூதியம் ரூ. 3000, நெசவாளர்களின் உற்பத்தி செலவை குறைக்க 50% மானியம் வழங்கப்படும் என வாக்குறுதி அளித்துள்ளார்.

திருப்பூர் மாவட்டம் பெருமாநல்லூரில் தமிழக வெற்றிக் கழக வேட்பாளர்களை ஆதரித்து விஜய் பிரசாரம் மேற்கொண்டார்.

பிரசாரத்தில் தவெக திட்டங்கள் குறித்து விஜய் பேசியதாவது:

நெசவாளர் தயாரிப்புகளை விற்பனை செய்ய அரசுக்கு சொந்தமான உலகளாவிய இ-காமர்ஸ் பிராண்ட் உருவாக்கப்படும். முக்கிய நகரங்களில் தறி விற்பனை நிலையங்கள் அமைக்கப்படும்.

நிலையற்ற நூல் விலை, மின்சார சுமையை பகிர்ந்துகொள்ள கைத்தறி, விசைத்தறி வைத்திருக்கும் நெசவாளர் குடும்பங்களுக்கு ஆண்டுக்கு ரூ. 30,000 வழங்கப்படும்.

கைத்தறி இலவச மின்சாரம் 500 யூனிட்டுகளாகவும் விசைத்தறிகளுக்கான இலவச மின்சாரம் 1500 யூனிட்டுகளாகவும் உயர்த்தப்படும்.

நெசவாளர்களின் உற்பத்தி செலவைக் குறைக்க நூல், ரசாயனங்களுக்கு 50% மானியம் வழங்கப்படும்.

அனைத்து நெசவாளார்களுக்கு. ரூ. 10 லட்சம் காப்பீடு

நெசவாளர் முதியோர் ஓய்வூதியம் ரூ. 3,000 ஆக உயர்த்தப்படும்.

இந்தியாவில் அதிக சிறு, குறு, நடுத்தர தொழில்கள் முடங்கிய மாநிலங்களில் தமிழ்நாடு 2வது இடத்தில் உள்ளது. இது திமுக அரசு செய்த சாதனை.

நெருக்கடியில் உள்ள சிறு, குறு, நடுத்தர நிறுவனங்களுக்காக ரூ. 15 ஆயிரம் கோடி கியாரண்டி நிதி உருவாக்கப்படும்.

சிறு, குறு, நடுத்தர நிறுவனங்கள் மூடப்படுவதற்கான முக்கிய காரணம் மின் கட்டணம். இது சிறு, குறு, நடுத்தர நிறுவனங்களை கடுமையாக பாதித்துள்ளது. இந்த மின் கட்டணத்தை தவெக அரசு நிறுத்தி வைக்கும். விரிவான ஆய்வுக்கு பிறகு மின் கட்டணம் முறைப்படுத்தப்படும்.

சிறு, குறு, நடுத்தர நிறுவனங்கள் அடுத்து வரும் 5 ஆண்டுகளுக்கு மின்சார வரி விலக்கு பெறும்.

சிறு, குறு, நடுத்தர நிறுவனங்களை நவீனமயமாக்க 35% நேரடி மூலதன மானியத்தை அரசு வழங்கும்.