என்ஆர்சி விவகாரத்தால் அமளி: மாநிலங்களவை நாள் முழுவதும் ஒத்திவைப்பு

அஸ்ஸாம் தேசிய குடிமக்கள் பதிவேடு (என்ஆர்சி) விவகாரத்தை முன்வைத்து திரிணமூல் காங்கிரஸ் உறுப்பினர்கள் அமளியில் ஈடுபட்டதால், மாநிலங்களவை வியாழக்கிழமை நாள் முழுவதும் ஒத்திவைக்கப்பட்டது.
மாநிலங்களவை, தலைவர் வெங்கய்ய நாயுடு தலைமையில் காலை கூடியதும், என்ஆர்சி விவகாரத்தை திரிணமூல் காங்கிரஸ் எம்.பி. டெரீக் ஓ பிரையன் எழுப்பினார். என்ஆர்சி பதிவேடு குறித்து மத்திய உள்துறை அமைச்சர் ராஜ்நாத் சிங்கிடம் விளக்கம் கேட்டு தாக்கல் செய்த நோட்டீஸை நிராகரித்தது ஏன்? என்று கேள்வி எழுப்பினார். அதற்கு வெங்கய்ய நாயுடு அளித்த பதில்:
இந்த விவகாரம் குறித்து பதில் அளிக்க வேண்டும் என்ற எண்ணத்துடன் ராஜ்நாத் சிங் கடந்த 2 நாள்களாக மாநிலங்களவைக்கு வந்தார். அனைவரின் கருத்துகளையும் பொறுமையாகக் கேட்டறிந்த அவர் விளக்கம் அளிப்பதற்கு நீங்கள் வாய்ப்பளிக்கவில்லை.
காலையில் நடைபெற்ற கூட்டத்தில் கூட, என்ஆர்சி விவகாரம் குறித்து ராஜ்நாத் சிங் பதிலளிக்க வேண்டும்; எதிர்க்கட்சித் தலைவர்களை நாடாளுமன்ற விவகாரங்கள் துறை அமைச்சர் அழைத்துப் பேச வேண்டும் என்று காங்கிரஸ் மூத்த தலைவர் ஆனந்த் சர்மா ஆலோசனை தெரிவித்தார் என்றார் வெங்கய்ய நாயுடு.
அதைத் தொடர்ந்து பேசிய மாநிலங்களவை எதிர்க்கட்சித் தலைவர் குலாம் நபி ஆஸாத், ஒவ்வொரு அரசியல் கட்சியின் உறுப்பினரும் பேசுவதற்கு அனுமதி அளிக்கப்படுகிறது; ஆனால், அஸ்ஸாமைச் சேர்ந்த உறுப்பினர்கள் பேசுவதற்கு வாய்ப்பளிக்கவில்லை' என்று குற்றம் சாட்டினார். இதையடுத்து, விவசாயிகள் பிரச்னைகள் குறித்து விவாதிக்கலாம் என்று உறுப்பினர்களை வெங்கய்ய நாயுடு வலியுறுத்தினார். ஆனால், உள்துறை அமைச்சர் பதிலளிக்க வேண்டும் என்று திரிணமூல் காங்கிரஸ் எம்.பி.க்கள் வலியுறுத்தினார்.
இதனால், அவை உணவு இடைவேளை வரை ஒத்திவைக்கப்பட்டது. உணவு இடைவேளைக்குப் பிறகு மாநிலங்களவை மீண்டும் கூடியதும், அவையின் மையப்பகுதியில் திரண்ட திரிணமூல் காங்கிரஸ் உறுப்பினர்கள், அமைச்சர் ராஜ்நாத் சிங் பதிலளிக்க வேண்டும் என்று வலியுறுத்தினர். உள்துறை அமைச்சர் பதிலளிப்பார் என்று வெங்கய்ய நாயுடு உறுதியளித்த பிறகும், உறுப்பினர்கள் அமளியில் ஈடுபட்டனர். இதனால், அவையை வெங்கய்ய நாயுடு நாள் முழுவதும் ஒத்திவைத்தார்.