கேரளாவின் நிலை மிகுந்த வலியை அளிக்கிறது: ராகுல் காந்தி

கேரளாவின் நிலை மிகுந்த வலியை அளிக்கிறது என்று காங்கிரஸ் தலைவர் ராகுல் காந்தி தெரிவித்துள்ளார்.

கடந்த 8-ஆம் தேதி கேரளத்தில் தொடங்கிய மழையானது, தொடர்ந்து தீவிரம் குறையாமல் பெய்து வருகிறது. இதனால் மாநிலம் வெள்ளம், நிலச்சரிவு போன்ற இடர்பாடுகளில் சிக்கி தவித்து வருகிறது. மாநிலமே உருகுலைந்து காணப்படுகிறது. அணைகள் நிறைந்து வழிவதால் ஆறுகளில் வெள்ளம் ஏற்பட்டுள்ளது. மழையால் 14 மாவட்டங்களில் மக்களின் இயல்பு வாழ்க்கை முற்றிலும் முடங்கிப்போய் உள்ளது.

இதுகுறித்து காங்கிரஸ் தலைவர் ராகுல் காந்தி தனது டிவிட்டர் பதிவில், 
கேரளாவின் நிலை மிகுந்த வலியை அளிக்கிறது. மீட்புப் பணிகளுக்கு ராணுவம், கடற்படை வீரர்களை அதிகளவில் அனுப்ப பிரதமரிடம் கோரினேன். கேரள மாநிலத்துக்கு சிறப்பு நிதியுதவி அளிக்கவும் பிரதமரிடம் கோரிக்கை வைத்துள்ளேன். இவ்வாறு அவர் குறிப்பிட்டுள்ளார்.