மக்களுக்கு ரூ.15 லட்சம் மெதுவாக வரும்! ராம்தாஸ் அதாவலே

நாட்டு மக்களின் வங்கிக் கணக்குகளில் ரூ.15 லட்சம் பணம் மெதுவாக வந்து சேரும்; இந்த விவகாரத்தில் அளிக்கப்பட்ட வாக்குறுதியை நிறைவேற்றுவதில் சில தொழில்நுட்ப சிக்கல்கள் இருக்கின்றன என்று மத்திய அமைச்சரும், இந்திய குடியரசு கட்சி (ஏ) தலைவருமான ராம்தாஸ் அதாவலே தெரிவித்திருப்பது பரபரப்பை ஏற்படுத்தியுள்ளது.
வெளிநாடுகளில் உள்ள கருப்பு பணம் மீட்கப்பட்டு, நாட்டு மக்களின் வங்கி கணக்குகளில் ரூ.15 லட்சம் செலுத்தப்படும் என்ற வாக்குறுதியை நிறைவேற்றாமல் பிரதமர் நரேந்திர மோடி மக்களை ஏமாற்றிவிட்டார் என்று காங்கிரஸ் தலைவர் ராகுல் காந்தி தொடர்ந்து குற்றம்சாட்டி வருகிறார். காங்கிரஸ் மட்டுமன்றி பல்வேறு எதிர்க்கட்சிகளும் அவரை விமர்சித்து வருகின்றன.
இந்நிலையில், மகாராஷ்டிர மாநிலம், இஸ்லாம்பூரில் செய்தியாளர்களுக்கு பேட்டியளித்த ராம்தாஸ் அதாவாலேவிடம் இந்த விவகாரம் குறித்து கேள்வியெழுப்பப்பட்டது. அவர் அளித்த பதில் வருமாறு: இந்த விவகாரத்தில் ஏற்கெனவே வாக்குறுதி அளிக்கப்பட்டது. எனினும், அதனை நிறைவேற்றுவதில் தொழில்நுட்ப சிக்கல்கள் இருக்கின்றன. மக்களின் வங்கிக் கணக்குகளில் ரூ.15 லட்சம் பணம் ஒரேயடியாக வந்து சேராது. மெதுவாகவே வரும். மத்திய அரசிடம் அந்த அளவுக்கு பணம் இல்லை. ரிசர்வ் வங்கியிடம் மத்திய அரசு நிதி கோரியது. ஆனால், ரிசர்வ் வங்கி நிதி வழங்கவில்லை என்றார் ராம்தாஸ் அதாவலே.
பிரதமர் நரேந்திர மோடி, துடிப்பாக ஆட்சி நடத்தி வருவதாகவும் அடுத்த மக்களவைத் தேர்தலில் பாஜக வெற்றி பெறும் என்றும் அவர் கூறினார்.