லேசர் தொழில்நுட்பத்திலான வேலி: 17-இல் தொடங்கி வைக்கிறார் ராஜ்நாத்

நாட்டிலேயே முதல் முறையாக ஜம்மு காஷ்மீர் எல்லைப் பகுதிகளில் லேசர் தொழில் நுட்பத்துடன் கூடிய வேலியை மத்திய உள்துறை அமைச்சர் ராஜ்நாத் சிங் வரும் 17-ஆம் தேதி அதிகாரப்பூர்வமாக தொடங்கி வைக்கிறார்.
இதுதொடர்பாக அரசு அதிகாரிகள் வியாழக்கிழமை கூறியதாவது:
முன்னோட்ட அடிப்படையில் செயல்படுத்தப்படும் இந்த லேசர் வேலி' குறித்த செயல் விளக்கத்தை, ராஜ்நாத் சிங் முன்பாக எல்லை பாதுகாப்புப் படை மற்றும் துணை ராணுவப் படையைச் சேர்ந்த மூத்த அதிகாரிகள் செய்து காட்ட உள்ளனர்.
இந்த லேசர் வேலி அமைப்போடு கண்காணிப்பு கேமரா இணைப்புகளும் இருக்கும். எல்லையை ஒட்டிய நிலைகளில் இருக்கும் பாதுகாப்புப் படையினர் அதன் மூலமாக கண்காணிப்பு நடவடிக்கைகளை மேற்கொண்டு தேவையேற்படும் பட்சத்தில் உடனடி பதில் நடவடிக்கைகளை மேற்கொள்ளலாம்.
இந்த லேசர் வேலியானது, வரும் காலத்தில் பாகிஸ்தான், வங்கதேசத்துடன் இந்தியா பகிர்ந்துகொண்டுள்ள எல்லைப் பகுதியில் 2,400 கி.மீ. தொலைவுக்கு நிறுவப்படும். ஊடுருவல் மற்றும் சட்டவிரோத குடியேற்றங்களை தடுக்க பிரதமர் மோடி தலைமையிலான மத்திய அரசு முன்னெடுத்துள்ள விரிவான ஒருங்கிணைந்த எல்லை மேலாண்மை அமைப்பு' என்ற நடவடிக்கையின் ஒரு பகுதியாக இந்த முயற்சி மேற்கொள்ளப்படுகிறது என்று அந்த அதிகாரிகள் கூறினர்.