நிதித்துறை செயலர் அஜய் நாராயண் ஜாவுக்கு ஒரு மாதம் பணி நீட்டிப்பு

மத்திய நிதித்துறை செயலர் அஜய் நாராயண் ஜாவுக்கு ஒரு மாத காலம் பணி நீட்டிப்பு அளிக்கப்பட்டுள்ளது. இது தவிர 15-ஆவது நிதிக் குழுவின் உறுப்பினராகவும் அவர் அறிவிக்கப்பட்டுள்ளார். இது தொடர்பாக அதிகாரப்பூர்வ அறிவிப்பு திங்கள்கிழமை வெளியானது. முன்னதாக அவரது பணி நீட்டிப்புக்கு நியமனங்களுக்கான மத்திய அமைச்சரவைக் குழு ஒப்புதல் அளித்தது.
1982-ஆம் ஆண்டு மணிப்பூரில் இருந்து ஐஏஎஸ் அதிகாரியான ஜாவின் பதவிக்காலம் வரும் ஜனவரி 31-ஆம் தேதியுடன் நிறைவடைகிறது. அதன் பிறகு அவருக்கு ஒரு மாத காலம் பதவி நீட்டிப்பு அளிக்கப்படுகிறது. இதைத் தொடர்ந்து வரும் மார்ச் 1-ஆம் தேதி முதல் 15-ஆவது நிதிக்குழுவின் உறுப்பினர் பொறுப்பை அவர் ஏற்பார் என்று தெரிவிக்கப்பட்டுள்ளது.
நிதிக் குழுவின் உறுப்பினராக இருந்த சக்திகாந்த தாஸ், ரிசர்வ் வங்கி ஆளுநராக அண்மையில் நியமிக்கப்பட்டார். இதையடுத்து, அந்த இடம் காலியானது நினைவுகூரத்தக்கது.