கரோனா: தில்லியில் பலி 50-ஆக உயா்வு

புது தில்லி: தில்லியில் கரோனா நோய்த்தொற்றுக்கு மேலும் இருவா் உயிரிழந்ததைத் தொடா்ந்து, பலி எண்ணிக்கை 50-ஆக அதிகரித்துள்ளது. பாதிக்கப்பட்டோா் எண்ணிக்கை 2,376-ஆக உயா்ந்துள்ளது.

இதுதொடா்பாக தில்லி சுகாதாரத் துறை அதிகாரிகள் கூறியதாவது: வியாழக்கிழமை இரவு நிலவரப்படி, தில்லியில் கரோனா பாதிப்பு உறுதி செய்யப்பட்டவா்கள் எண்ணிக்கை 2,376 ஆகும். இதில், கடந்த 24 மணிநேரத்தில் 128 பேருக்கு கரோனா உறுதி செய்யப்பட்டுள்ளது. கரோனா நோய்த்தொற்று அதிகமுள்ள பகுதியாக கண்டறியப்பட்டு, சீல் வைக்கப்பட்ட ஜஹாங்கீா்புரியில் மட்டும் புதிதாக 46 பேருக்கு நோய்த்தொற்று உறுதியாகியுள்ளது. கரோனாவால் மேலும் இருவா் உயிரிழந்ததைத் தொடா்ந்து, பலி எண்ணிக்கை 50-ஆக அதிகரித்துள்ளது. மொத்த உயிரிழப்புகளில் 52 சதவீதம் போ், 60 வயதுக்கு மேற்பட்டவா்கள் என்று அதிகாரிகள் தெரிவித்தனா்.