விவசாயிகள் பேரணி: காவல்துறையின் கோரிக்கையை நிராகரித்த தில்லி அரசு

தில்லியை நோக்கிய விவசாயிகளின் பேரணியைத் தொடர்ந்து 9 மைதானங்களை தற்காலிக சிறைகளாகப் பயன்படுத்த அனுமதி கோரிய தில்லி காவல்துறையின் கோரிக்கையை மாநில அரசு நிராகரித்துள்ளது.

மத்திய அரசு அண்மையில் கொண்டுவந்த வேளாண் சட்டங்களுக்கு எதிா்ப்புத் தெரிவித்து பஞ்சாப் உள்ளிட்ட மாநில விவசாயிகள் தலைநகா் தில்லி நோக்கி பேரணியில் ஈடுபட்டுள்ளதால், தில்லி மாநில எல்லைகளில் பாதுகாப்பு பலப்படுத்தப்பட்டது.

தில்லியை ஹரியாணாவுடன் இணைக்கும் எல்லைப் பகுதியில் திரண்ட விவசாயிகள் மீது தில்லி காவல்துறையினர் கண்ணீர் புகைக் குண்டுகளை வீசினர். தொடர்ந்து தில்லியின் எல்லையில் விவசாயிகள் தடுத்து நிறுத்தப்பட்டுள்ளனர். 

மேலும், விவசாயிகள் தில்லிக்குள் நுழைய தடை விதிக்கப்பட்டுள்ளது. அதை மீறி அவர்கள் உள்ளே நுழைந்தால் கடும் நடவடிக்கை எடுக்கப்படும் என்றும் காவல்துறை அதிகாரிகள் கூறியுள்ளனர்.

இந்நிலையில், விவசாயிகளின் பேரணியையொட்டி தில்லி எல்லையில் காவல்துறை பாதுகாப்பு அதிகரிக்கப்பட்டுள்ளது. விவசாயிகளின் பேரணியைக் கட்டுப்படுத்த முடியாமல் தவித்து வரும் தில்லி காவல்துறை தில்லியில் உள்ள 9 மைதானங்களை தற்காலிக சிறைகளாகப் பயன்படுத்த மாநில அரசிடம் அனுமதி கோரியது.

இதனைத் தொடர்ந்து விவசாயிகளின் எதிர்ப்பைக் கருத்தில் கொண்டு 9 மைதானங்களை தற்காலிக சிறைகளாக மாற்ற அனுமதி கோரிய தில்லி காவல்துறையின் கோரிக்கையை டெல்லி அரசு நிராகரித்தது.

முன்னதாக ஆம் ஆத்மி கட்சியின் தலைவரும், தில்லி முதல்வருமான அரவிந்த கேஜரிவால் விவசாயிகள் பேரணியைத் தடுக்க கண்ணீர் புகைக்குண்டுகள் மற்றும் தண்ணீர் பீரங்கிகளைப் பயன்படுத்தியதற்கு கண்டனம் தெரிவித்திருந்தார் என்பது குறிப்பிடத்தக்கது.