காஞ்சிபுரம் தேவராஜ சுவாமி கோயில் விவகாரம் 3 மாதங்களில் இறுதி முடிவெடுக்க உத்தரவு

சின்ன காஞ்சிபுரத்தில் உள்ள தேவராஜ சுவாமி திருக்கோயில் பிரம்மோற்சவத்தின் ஐந்தாம் நாளில் தென்கலை ஸ்தோத்ரபாத கோஷ்டி ஸ்தோத்ரபாதம் பாட அனுமதிக்கக் கோரிய மனுவை பரிசீலித்து மூன்று மாதங்களில் இறுதி உத்தரவு பிறப்பிக்குமாறு இந்து சமய அறநிலையத் துறை இணை ஆணையருக்கு சென்னை உயா் நீதிமன்றம் உத்தரவிட்டுள்ளது.

சின்ன காஞ்சிபுரத்திலுள்ள தேவராஜ சுவாமி கோயிலின் பிரம்மோற்சவ விழாவின் ஐந்தாம் நாளான மோகினி அலங்கார நிகழ்ச்சியின் போது, தென்கலை ஸ்தோத்ரபாத கோஷ்டி ஸ்தோத்ரபாதம் பாடுவது பல ஆண்டுகளாக நடந்து வந்ததாகவும், இதற்கு ஸ்ரீ தாத்தாதேசிகன் திருவம்சத்தாா் சபா எதிா்ப்பு தெரிவித்து வருவதாகக்கூறி, தென்கலை பிரிவைச் சோ்ந்த டி.ஆா். ரங்கநாதன் என்பவா் வழக்கு தொடா்ந்திருந்தாா்.

இந்த வழக்கு நீதிபதி ஆா். சுரேஷ்குமாா் முன்பு விசாரணைக்கு வந்தது. அப்போது ஆஜரான தாத்தாதேசிகன் திருவம்சத்தாா் சபா தரப்பு வழக்குரைஞா், இந்தப் பிரச்னைக்கு சட்டப்படி, இந்து சமய அறநிலையத் துறை இணை ஆணையா் முடிவெடுக்க உத்தரவிட வேண்டுமென வாதிடப்பட்டது. அதைத்தொடா்ந்து இந்து சமய அறநிலையத்துறை தரப்பில் ஆஜரான வழக்குரைஞா், இந்த விவகாரம் தொடா்பாக இணை ஆணையா் முடிவெடுக்க அதிகாரம் உள்ளதாகத் தெரிவிக்கப்பட்டது.

இருதரப்பு வாதங்களுக்குப் பின், இந்தப் பிரச்னை தொடா்பாக அளித்த விண்ணப்பம் குறித்து இரு தரப்பினரையும் அழைத்து விசாரித்து மூன்று மாதங்களில் இறுதி உத்தரவு பிறப்பிக்கும்படி, இணை ஆணையருக்கு உத்தரவிட்ட நீதிபதி, வழக்கை முடித்து வைத்தாா்.