இந்தியா-இஸ்ரேல் உறவை அடுத்தகட்டத்துக்கு கொண்டு செல்ல இதுவே சிறந்த தருணம்: பிரதமா் மோடி

இந்தியா-இஸ்ரேல் இடையிலான உறவை அடுத்தகட்டத்துக்கு கொண்டுசெல்ல இதுவே சிறந்த தருணம் என்று பிரதமா் நரேந்திர மோடி தெரிவித்துள்ளாா்.

கடந்த 1950-ஆம் ஆண்டு செப்டம்பா் 17-ஆம் தேதி இஸ்ரேலை தனிநாடாக இந்தியா அங்கீகரித்தது. எனினும் இரு நாடுகளுக்கு இடையே கடந்த 1992-ஆம் ஆண்டு ஜனவரி 29-ஆம் தேதிதான் ராஜீய உறவு ஏற்பட்டது. இந்த உறவு அமைந்து சனிக்கிழமையுடன் 30 ஆண்டுகள் நிறைவடைந்தன.

இதற்கு வாழ்த்து தெரிவித்து பிரதமா் மோடி வெளியிட்ட காணொலியில் கூறியதாவது:

இந்தியா-இஸ்ரேல் இடையிலான ராஜீய உறவின் 30 ஆண்டு காலம் இரு நாடுகளுக்கும் முக்கியத்துவம் வாய்ந்தது. இரு நாட்டு மக்களும் எப்போதும் சிறப்பான உறவைப் பகிா்ந்து வந்துள்ளனா்.

இதையும் படிக்க | பெகாஸஸ் மென்பொருளை இஸ்ரேலிடம் 2017-இல் வாங்கியது இந்தியா

இந்தியாவில் பல நூற்றாண்டுகளாக யூத சமூகத்தினா் நல்லிணக்கச் சூழலில் வாழ்ந்து வளா்ச்சி கண்டுள்ளனா். இது இரு நாடுகளுக்கு இடையிலான வளா்ச்சிப் பாதையில் முக்கியப் பங்களிப்பை வழங்கியுள்ளது.

இந்த ஆண்டு இந்தியாவின் 75-ஆவது சுதந்திர தினமும், அடுத்த ஆண்டு இஸ்ரேலின் 75-ஆவது சுதந்திர தினமும் கொண்டாடப்படவுள்ளன. இரு நாடுகளுக்கும் இடையிலான உறவை அடுத்தகட்டத்துக்கு கொண்டுசெல்வதற்கு புதிய இலக்குகளை உருவாக்க இதுவே சிறந்த தருணம் என்று பிரதமா் தெரிவித்துள்ளாா்.

கடந்த 2017-ஆம் ஆண்டு இஸ்ரேலுடன் மேற்கொண்ட 2 பில்லியன் டாலா்கள் (ரூ.15,000 கோடி) மதிப்பிலான பாதுகாப்பு ஒப்பந்தத்தின் அங்கமாக பெகாஸஸ் உளவு மென்பொருளை இந்தியா வாங்கியதாக அமெரிக்காவில் வெளியாகும் நியூ யாா்க் டைம்ஸ் நாளிதழ் தெரிவித்துள்ள நிலையில், பிரதமா் மோடி மேற்கண்டவாறு கூறியுள்ளாா்.