தொலைக்காட்சி நெறியாளா் மீது நடவடிக்கை எடுக்க தற்காலிகத் தடை: உச்சநீதிமன்றம்

காங்கிரஸ் எம்.பி. ராகுல் காந்தியின் பேட்டியை திரித்து வெளியிட்ட விவகாரத்தில் ஜீ தொலைக்காட்சி நெறியாளா் ரோஹித் ரஞ்சன் மீது நடவடிக்கை எடுக்க உச்சநீதிமன்றம் தற்காலிக தடை விதித்தது.

கேரளத்தில் தனது அலுவலகத்தை சூறையாடிவா்கள் சிறாா்கள் என்பதால் அவா்களை மன்னித்துவிடுகிறேன் என்று ராகுல் காந்தி கூறியதை, ராஜஸ்தான் தையல்காரா் கொலைகாரா்களை ராகுல் மன்னிப்பதாக ஜீ தொலைக்காட்சியில் ஜூலை 1-ஆம் தேதி செய்தி வெளியாகி சா்ச்சையை ஏற்படுத்தியது.

இந்த செய்தியை நெறியாளராக இருந்த வழங்கிய ரோஹித் ரஞ்சன் மீது சத்தீஸ்கா், ராஜஸ்தான், நொய்டாவில் வழக்குகள் பதிவாகின.

இந்த வழக்குகளை ரத்து செய்யக் கோரி ரோஹித் உச்சநீதிமன்றத்தில் தாக்கல் செய்த மனு நீதிபதிகள் இந்திரா பானா்ஜி, ஜே.கே.மகேஷ்வரி ஆகியோா் அடங்கிய விடுமுறைக் கால அமா்வு முன் வெள்ளிக்கிழமை விசாரணைக்கு வந்தது. அப்போது ரோஹித் ரஞ்சன் சாா்பில் ஆஜரான மூத்த வழக்குரைஞா் சித்தாா்த் லூத்ரா, ‘தெரியாமல் செய்த மனிதத் தவறுக்காக ரோஹித் மன்னிப்பு கேட்டுள்ளாா். இதற்கு காரணமான இரண்டு ஊழியா்கள் தங்கள் தவறுக்கு மன்னிப்பு கேட்டு ராஜிநாமா செய்துள்ளனா்’ என்றாா்.

அப்போது, மத்திய அரசுக்கு நோட்டீஸ் அனுப்பு உத்தரவிட்ட நீதிபதிகள், ‘நெறியாளா் ஹோஹித் ரஞ்சன் மீது பல்வேறு மாநிலங்களில் பதிவான வழக்குகளின் கீழ் விசாரணை என்ற பெயரில் நடவடிக்கை எடுக்க தற்காலிக தடை விதிக்கப்படுகிறது’ என்று உத்தரவிட்டனா்.

முன்னதாக, இந்த விவகாரத்தில் ரோஹித்தை கைது செய்து விசாரணை நடத்த சத்தீஸ்கா் போலீஸாா் உத்தர பிரதேச மாநிலம் காஜியாபாதில் உள்ள அவரது வீட்டிற்கு செவ்வாய்க்கிழமை அதிகாலை வந்தனா். இதை அறிந்த நொய்டா (ஹரியாணா) போலீஸாா், சத்தீஸ்கா் போலீஸாரை காக்க வைத்துவிட்டு தங்களிடமும் பதிவாகி உள்ள இந்த விவகாரம் தொடா்பான வழக்கை விசாரிக்க ரோஹித்தை அழைத்துச் சென்றனா். பின்னா் செவ்வாய்க்கிழமை இரவு அவரை நீதிமன்றத்தில் ஆஜா்படுத்தி ஜாமீனில் விடுவித்தனா்.