குற்றவியல் சட்ட மசோதாக்கள்: தன்கரிடம் அறிக்கைகள் சமா்ப்பிப்பு

மூன்று குற்றவியல் சட்டங்களுக்கு மாற்றான மசோதாக்கள் மீதான நாடாளுமன்ற நிலைக் குழுவின் அறிக்கைகள், மாநிலங்களவைத் தலைவரும் குடியரசு துணைத் தலைவருமான ஜகதீப் தன்கரிடம் வெள்ளிக்கிழமை சமா்ப்பிக்கப்பட்டன.

உள்துறை விவகாரங்கள் தொடா்பான நாடாளுமன்ற நிலைக் குழுவின் தலைவா் பிரிஜ் லால், நாடாளுமன்றத்தில் ஜகதீப் தன்கரை நேரில் சந்தித்து, அறிக்கைகளை அளித்தாா். இத்தகவலை, தன்கரின் செயலகம் எக்ஸ் வலைதளத்தில் பதிவிட்டுள்ளது.

உள்துறை விவகாரங்கள் தொடா்பான நாடாளுமன்ற நிலைக் குழு, மாநிலங்களவை செயலகத்தின்கீழ் வருவதால், அதன் அறிக்கைகள் தன்கரிடம் சமா்ப்பிக்கப்பட்டுள்ளன.

பிரிட்டிஷ் ஆட்சிக் கால குற்றவியல் சட்டங்களான இந்திய தண்டனைச் சட்டம் (ஐபிசி), குற்றவியல் நடைமுறைச் சட்டம் (சிஆா்பிசி), சாட்சியங்கள் சட்டம் ஆகியவற்றை மாற்றுவதற்கான மூன்று மசோதாக்களை, மக்களவையில் மத்திய உள்துறை அமைச்சா் அமித் ஷா கடந்த ஆகஸ்டில் அறிமுகம் செய்தாா்.

அதன்படி, இந்திய தண்டனைச் சட்டம் (ஐபிசி) 1860-ஐ மாற்றம் செய்ய ‘பாரதிய நியாய சம்ஹிதா (பிஎன்எஸ்) மசோதா-2023’ , குற்றவியல் நடைமுறைச் சட்டம் (சிஆா்பிஏ) 1898-ஐ மாற்றம் செய்ய ‘பாரதிய நாகரிக் சுரக்ஷா சம்ஹிதா (பிஎன்எஸ்எஸ்) மசோதா-2023’, இந்திய சாட்சிய சட்டம் 1872-ஐ மாற்றம் செய்ய ‘பாரதிய சாக்ஷிய (பிஎஸ்) மசோதா 2023’ ஆகியவை அறிமுகம் செய்யப்பட்டன.

‘இந்த மூன்று மசோதாக்களும் இந்திய குற்றவியல் நீதி அமைப்புமுறையை பெரிய அளவில் மாற்றும்; விரைவாக நீதி வழங்கவும், மக்களின் சமகால தேவைகள் மற்றும் விருப்பங்களை பூா்த்தி செய்யும் சட்ட அமைப்புமுறையை உருவாக்கவும் உரிய மாற்றங்கள் முன்மொழியப்பட்டுள்ளன’ என்று அமித் ஷா குறிப்பிட்டிருந்தாா்.

பின்னா், மூன்று மசோதாக்களையும் உள்துறை விவகாரங்கள் தொடா்பான நாடாளுமன்ற நிலைக் குழுவின் ஆய்வுக்கு மக்களவை பரிந்துரைத்தது.

பாஜக எம்.பி. பிரிஜ் லால் தலைமையிலான இக்குழு, மசோதாக்கள் தொடா்பான அறிக்கைகளை சில திருத்தங்களுடன் இம்மாத தொடக்கத்தில் ஏற்றது. அதேநேரம், குற்றவியல் சட்டங்களுக்கு ஹிந்தி பெயா் சூட்டப்பட்டுள்ளதற்கு எதிா்க்கட்சி உறுப்பினா்கள் தெரிவித்த ஆட்சேபங்கள் நிராகரிக்கப்பட்டன.

அலட்சியத்தால் உயிரிழப்பை ஏற்படுத்தும் குற்றத்துக்கான தண்டனையை கடுமையாக்க நாடாளுமன்றக் குழு முன்மொழிந்துள்ளது. அரசு ஊழியா்களை பணி செய்யவிடாமல் தடுக்கும் குற்றத்துக்கான அதிகபட்ச சிறை தண்டனையை 2 ஆண்டுகள் என்பதில் இருந்து ஓராண்டாக குறைக்க பரிந்துரைக்கப்பட்டுள்ளது.

திருமணத்தை மீறிய உறவு தொடா்பான சட்டங்களில் பாலின நடுநிலைத்தன்மையை உறுதி செய்யவும் நாடாளுமன்றக் குழு ஆதரவளித்துள்ளது.

டிசம்பா் 4-ஆம் தேதி தொடங்கும் நாடாளுமன்ற குளிா்கால கூட்டத் தொடரில் மேற்கண்ட மூன்று மசோதாக்களும் பரிசீலனைக்கு எடுத்துக் கொள்ளப்படும் என்று எதிா்பாா்க்கப்படுகிறது.