பாரீஸ் ஒலிம்பிக் போட்டியின் மல்யுத்த இறுதி ஆட்டத்தில் தகுதிநீக்கம் செய்யப்பட்ட இந்திய வீராங்கனை வினேஷ் போகத் தொடர்ந்த வழக்கில், இன்று இரவு 9,30 மணிக்கு வெளியாகும் என்று எதிர்பார்க்கப்படுகிறது.
பாரீஸ் ஒலிம்பிக் விளையாட்டுப் போட்டிகளில் மல்யுத்தத்தில் மகளிருக்கான 50 கிலோ எடை பிரிவில் இறுதிப்போட்டிக்கு முன்னேறிய இந்திய வீராங்கனை வினேஷ் போகத், 50 கிலோ எடைப்பிரிவில் விளையாட வேண்டிய நிலையில், உடல் எடை 100 கிராம் அதிகமாக இருந்ததாகக் கூறி தகுதிநீக்கம் செய்யப்பட்டார்.
இறுதிப் போட்டிக்கு முன்னேறியதால், தனக்கு வெள்ளிப் பதக்கம் வழங்க வேண்டும் என்று சர்வதேச விளையாட்டு நடுவர் நீதிமன்றத்தில் வினேஷ் போகத் சார்பில் முறையிடப்பட்டது. இந்த மனு மீது வாதங்கள் முன்வைக்கப்பட்டுள்ளன.
முன்னதாக, ஒலிம்பிக் போட்டிகள் நிறைவு பெறுவதற்கு முன்பே தீர்ப்பளிக்கப்படும் என எதிர்பார்க்கப்பட்ட நிலையில், இறுதித்தீர்ப்பு வழங்கப்படுவதற்கான கால அவகாசத்தை செவ்வாய்க்கிழமை(ஆக. 13) வரை சர்வதேச விளையாட்டு நீதிமன்றம் நீட்டித்திருந்தது.
இந்த நிலையில், வினேஷ் போகத்துக்கு வெள்ளிப் பதக்கம் வழங்கப்படுமா? என்ற எதிர்பார்ப்புக்கான விடை இன்று இரவு 9.30க்கு வெளியிடப்படும் என்று தகவல்கள் தெரிவிக்கின்றன.
