மன்மோகன் சிங்கை மத்திய அரசு அவமதித்துவிட்டது: இறுதிச்சடங்கு விவகாரத்தில் ராகுல் குற்றச்சாட்டு!

முன்னாள் பிரதமர் மன்மோகன் சிங் இறுதிச்சடங்கை நிகம்போத் காட் பகுதியில் நடத்தியதன் மூலம் மத்திய பாஜக அரசு அவரை அவமதித்துவிட்டது என காங்கிரஸ் தலைவர் ராகுல் காந்தி குற்றஞ்சாட்டியுள்ளார்.

முன்னாள் பிரதமர் மன்மோகன் சிங்கின் இறுதிச்சடங்கு யமுனை நதிக்கரையில் உள்ள நிகம்போத் காட் மயானத்தில் நடத்தப்பட்டது. அரசு மரியாதையுடன் அங்கிருந்த தகன மேடையில் அவரது உடல் இன்று எரியூட்டப்பட்டது.

இந்த நிலையில் அவரது இறுதிச்சடங்கினை தனி இடத்தில் நடத்தாமல் பொதுவான மயானத்தில் வைத்தது தொடர்பாக அரசியல் களத்தில் சர்ச்சை வெடித்துள்ளத்து.

இதுதொடர்பாக தனது எக்ஸ் தளப் பக்கத்தில் பதிவிட்டுள்ள ராகுல் காந்தி, “இந்தியத் தாயின் சிறந்த மகனும், முதல் சீக்கியப் பிரதமருமான டாக்டர். மன்மோகன் சிங்கின் இறுதிச்சடங்கை நிகம்போத் காட் பகுதியில் நடத்தியதன் மூலம் மத்திய அரசு அவரை அவமதித்துவிட்டது.

இதையும் படிக்க | விடைபெற்றார் மன்மோகன் சிங்! 21 குண்டுகள் முழங்க உடல் தகனம்!

அவரது பதவிக் காலத்தில் இந்தியா பொருளாதாரத்தில் மிகச் சிறந்து விளங்கியது. அவரது கொள்கைகள் சமூகத்தில் பின்தங்கிய ஒடுக்கப்பட்ட மக்களுக்கு ஆதரவாக விளங்கி வருகின்றன.

பாரம்பரியமாக அனைத்து முன்னாள் பிரதமர்களுக்கும் அவர்களின் இறுதிச்சடங்கில் அதற்கென தயார் செய்யப்பட்ட தனி நினைவிடத்தில் வைத்து இறுதி மரியாதைகள் செய்யப்படும். இதன் மூலம் அவர்களின் மகத்தான பங்களிப்புகளைக் கௌரவிப்பதோடு மட்டுமின்றி பொதுமக்களுக்கு எந்தச் சிரமமுமின்றி இறுதி மரியாதையைச் செலுத்தும் வாய்ப்பையும்வழங்குகின்றன.

இதையும் படிக்க | ராணுவ மரியாதையுடன் மன்மோகன் சிங்கிற்கு இறுதிச்சடங்கு!

மிகச்சிறந்த தலைவரும், சீக்கிய சமூகத்தின் சின்னமாக இருந்தவருமான மன்மோகன் சிங் இதுபோன்ற உயர்ந்த மரியாதையும் தனி நினைவிடத்தையும் பெற தகுதியானவர். அரசு இந்த மரபை காப்பாற்றி அவருக்கு உரிய மரியாதை அளித்திருக்க வேண்டும்” எனக் குறிப்பிட்டிருந்தார்.

இந்த விவகாரம் தொடர்பாக காங்கிரஸ் கட்சியினர் மட்டுமின்றி பலரும் மத்திய அரசை விமர்சித்து வருகின்றனர். மன்மோகன் சிங் இறுதிச் சடங்கிற்கு தனி இடம் ஒதுக்கி அவருக்கு உரிய மரியாதையை வழங்க மத்திய அரசு தவறிவிட்டதாகவும், இதில் பாஜக மோசமான விதத்தில் அரசியல் செய்வதாகவும் பலரும் சமூக வலைதளங்களில் விமர்சித்து வருகின்றனர்.