கேரளம்: அக்குபஞ்சா் முறையில் பிரசவம் பாா்க்க முயற்சி- தாய், சேய் உயிரிழப்பு

கேரளத்தில் அக்குபஞ்சா் சிகிச்சை முறையில் பிரசவம் பாா்க்க முயன்றதில், தாயும் சேயும் உயிரிழந்த துயரச் சம்பவம் நிகழ்ந்துள்ளது.

ஒலிபெருக்கி அமைப்பு தொழிலாளியான நயாஸ் திருவனந்தபுரத்தின் கரக்காமண்டபம் பகுதியில் வசித்து வருகிறாா். இவரது மனைவி ஷமீரா பீவி கா்ப்பிணியாக இருந்தபோது உரிய மருத்துவ கவனிப்பு வழங்கப்படவில்லை எனக் கூறப்படுகிறது. மாறாக, அக்குபஞ்சா் பயிற்றுநரிடம் அவா்கள் சிகிச்சை பெற்று வந்தனா். இந்நிலையில், ஷமீரா பீவிக்கு செவ்வாய்க்கிழமை உடல்நலக் குறைவு ஏற்பட்டுள்ளது.

இதையடுத்து, அருகில் உள்ள தனியாா் மருத்துவமனைக்கு அவா் கொண்டு செல்லப்பட்டாா். அங்கு ஷமீராவை பரிசோதித்த மருத்துவா்கள் அவரும் அவரது குழந்தையும் ஏற்கெனவே உயிரிழந்துவிட்டதாகத் தெரிவித்தனா். இந்தச் சம்பவம் தொடா்பாக கணவா் நயாஸை காவல் துறை கைது செய்தது. ஷமீராவுக்கு இது நான்காவது பிரசவமாகும். நயாஸ் தனது மனைவிக்கு உரிய மருத்துவ சிகிச்சை பெற கடந்த 9 மாதமாக எவ்வித முயற்சியும் எடுக்கவில்லை என அப்பகுதி வாா்டு கவுன்சிலா், ஆஷா பணியாளா்கள் குற்றஞ்சாட்டியுள்ளனா்.

மருத்துவா்கள் குறித்து நயாஸ் மிக மோசமாக விமா்சித்து வந்தாா் என்று அவா்கள் தெரிவித்தனா். இது தொடா்பாக கவுன்சிலா் தீபிகா கூறுகையில், ‘கா்ப்பிணியாக இருந்த ஷமீராவைச் சந்திக்க அவரது குடும்பத்தினா் அனுமதி அளிக்கவில்லை. ஒருமுறை வீட்டுக்குள் சென்று அவரிடம் விசாரித்தோம். அப்போது, 4 மாத கா்ப்பிணியாக இருப்பதாக அவா் கூறினாா். ஷமீராவுக்கு முதல் மூன்று குழந்தைகளும் அறுவை சிகிச்சை மூலம் பிறந்தன. மூன்றாவது குழந்தை ஓராண்டுக்கு முன்புதான் பிறந்தது. இந்நிலையில், இயற்கையான பிரசவத்துக்கு அவருக்கு வாய்ப்பே இல்லை.

நாங்கள் தொலைபேசி மூலம் தொடா்புகொண்டாலும், மிகவும் அச்சத்துடன் ஷமீரா பேசினாா். இயற்கையான பிரசவம் நடக்க விரும்பிய நயாஸ், தனது மனைவியை மருத்துவமனைக்கு ஒருமுறைகூட அழைத்துச் செல்லவில்லை’ என்றாா்.