காங்கிரஸ் வெற்றிக் கூட்டணி அமைக்கும்: ஜி.கே.வாசன்

மதுரையில் நடைபெற்ற காங்கிரஸ் கட்சிப் பிரமுகர் இல்லத் திருமணவிழாவில் கலந்து கொள்ள வந்திருந்த மத்திய கப்பல் போக்குவரத்துத் துறை அமைச்சர் ஜி.கே.வாசன், செய்தியாளர்களிடம் பேசினார். அப்போது,

தமிழக மீனவர்கள் மீதான தாக்குதல் கண்டிக்கத்தக்கது; இலங்கை கடற்படையினரின் தவறான அணுகுமுறையால் இது போன்ற கைதுகள் நடைபெறுகின்றன. மீனவர்கள் கைது பிரச்னைக்கு முற்றுப்புள்ளி வைக்க மத்திய அரசு நடவடிக்கை எடுக்கும் என்றார்.

திமுக, அதிமுக இரு தரப்புடனும் கூட்டணி வேண்டாம் என்று பாஜக கூறி வருகிறதே; காங்கிரஸ் நிலை என்ன என்று கேட்டபோது, கடந்த 2004, 2009 பொதுத் தேர்தல்களில் அகில இந்திய அளவில் காங்கிரஸ் வெற்றிக் கூட்டணி அமைத்தது. அதுபோல் இந்த முறையும் வெற்றிக் கூட்டணி அமைத்து போட்டியிடும் என்றார்.

4 மாநிலத் தேர்தல் முடிவுகள் குறித்துக் கேட்டபோது, 4 மாநிலத் தேர்தல் முடிவுகளை வைத்து 26 மாநிலங்களைக் கணிக்க முடியாது. அது தேசிய அளவிலான பிரச்னைகள். அப்போது அதன் நிலைமையும் மாறுபடும் என்றார்.

மதுரை கட்சிப் பிரமுகர் இல்லத் திருமணத்தை முடித்துக் கொண்டு பட்டுக்கோட்டை அருகே ஒரத்தநாடில் நடைபெறும் மற்றொரு இல்லத் திருமண விழாவில் கலந்து கொள்ளப் புறப்பட்டுச் சென்றார் ஜி.கே.வாசன்.