சிதம்பரம் ஸ்ரீநடராஜர் கோயிலில் கொடிமரத்திற்கு மகாகும்பாபிஷேகம்: திரளான பக்தர்கள் பங்கேற்பு

சிதம்பரத்தில் மே.1-ம் தேதி நடைபெறவுள்ள ஸ்ரீநடராஜர் கோயில் மகாகும்பாபிஷேகத்தை முன்னிட்டு நடராஜர் கோயிலில் சித்சபை எதிரே உள்ள கொடிமரத்திற்கும், அஷ்டதிக்கு பாலகர்களுக்கும் மகாகும்பாபிஷேகம் புதன்கிழமை வெகு சிறப்பாக நடைபெற்றது. திரளான பக்தர்கள் பங்கேற்று தரிசித்தனர்.

பூலோக கைலாயமான சிதம்பரம் நடராஜர் கோயிலில் 28 ஆண்டுகளுக்கு பிறகு வருகிறமே.1-ம் தேதி வெள்ளிக்கிழமை காலை 7 மணிக்கு மேல் 8.30 மணிக்குள் ஸ்ரீசிவகாமசுந்தரி சமேத ஸ்ரீமந் நடராஜமூர்த்தி வீற்றுள்ள சித்சபை கும்பாபிஷேகமும், அதே நேரத்தில் ராஜசபை மற்றும் நான்கு ராஜகோபுரங்களும் மகாகும்பாபிஷகம் நடைபெறவுள்ளது.

கும்பாபிஷேகத்தை முன்னிட்டு மே 2-ம் தேதி தேர்த்திருவிழாவும், 3-ம் தேதி அதிகாலை ஸ்ரீசிவகாமசுந்தரி சமேத ஸ்ரீமந் நடராஜமூர்த்திக்கு மகாபிஷேகமும், பிற்பகல் 2 மணிக்கு மேல் தரிசனம் மற்றும் சித்சபா பிரவேசமும் நடைபெறுகிறது. 4-ம் தேதி பஞ்சமூர்த்திகள் முத்துப்பல்லக்கு வீதிஉலா காட்சி நடைபெறுகிறது. மேற்கண்ட கும்பாபிஷேக நிகழ்ச்சியில் லட்சக்கணக்கான மக்கள் பங்கேற்பார்கள் என எதிர்பார்க்கப்படுகிறது. கும்பாபிஷேகத்தை முன்னிட்டு வருகிற ஏப்.22-ம் தேதி முக்குறுணி விநாயகர் கோயிலில் கணபதி ஹோமத்துடன் முதல் 12 கால யாகசாலை பூஜை தொடங்கி வைக்கப்பட்டது.

கொடிமரத்திற்கு மகாகும்பாபிஷேகம்:

ஸ்ரீசிவகாமசுந்தரி சமேத ஸ்ரீமந் நடராஜமூர்த்தி வீற்றுள்ள சித்சபை எதிரே உள்ள தங்க கொடிமரத்திற்கு (த்வஜஸ்தம்பம்) புதன்கிழமை காலை 9 மணிக்கு ஆச்சாரியார்களால் கும்பநீர் ஊற்றப்பட்டு மகாகும்பாபிஷேகம் வெகு சிறப்பாக நடைபெற்றது. மேலும் சித்சபையை சுற்றியுள்ள அஷ்டதிக்கு பாலகர்களுக்கும் கும்பாபிஷேகம் நடைபெற்றது. இதனை முன்னிட்டு செவ்வாய்க்கிழமை காலை 2 கால பூஜை தொடங்கப்பட்டு நடைபெற்றது. முன்னதாக புதன்கிழமை விக்னேஸ்வர பூஜை, கூஷ்மாண்ட ஹோமம், ஸ்ரீ நடராஜர் அனுக்ஞை பூஜை, ஸ்ரீமுக்குறுணி விநாயகர் கோயிலில் கணபதி ஹோமம் ஆகியவை நடைபெற்றது. இந்நிகழ்ச்சியில் திரளான பக்தர்கள் பங்கேற்று தரிசித்தனர். இதற்கான ஏற்பாடுகளை பொதுதீட்சிதர்களின் கமிட்டி செயலாளர் ஜ.சர்வேஸ்வர தீட்சிதர், கும்பாபிஷேக கட்டளை தீட்சிதர் டி.எம்.தியாகப்பாதீட்சிதர் மற்றும் பொதுதீட்சிதர்கள் செய்திருந்தனர்.