தென்மேற்கு பருவ மழை தொடங்கியது?: நெல்லை மாவட்டத்தில் நீர்பிடிப்பு பகுதியில் சாரல்

மேற்குத் தொடர்ச்சி மலையில் திருநெல்வேலி மாவட்டத்தில் அணைகளின் நீர்பிடிப்பு பகுதியில் 2 நாட்களாக சாரல் மழை பெய்து வருகிறது. இதையடுத்து அணைகளின் நீர்வரத்தில் மாற்றம் காணப்படுகிறது.

தாமிரவருணி பாசனத்தில் கார் சாகுபடி பணிகள் தொடங்க பாபநாசம், சேர்வலாறு அணைகளிலிருந்து தண்ணீர் திறக்கப்பட்டுள்ளது. ஜூன் முதல் வாரத்தில் தென்மேற்கு பருவ மழை தொடங்கும் என எதிர்பார்க்கப்பட்டது.

இதனிடையே மேற்குத் தொடர்ச்சி மலையில் அணைகளின் நீர்பிடிப்பு பகுதியில் சாரல் மழை பெய்து வருகிறது. வியாழக்கிழமை காலை நிலவரப்படி பாபநாசம் அணையில் 7 மி.மீ மழையும், சேர்வலாறு அணையில் 4 மி,மீ மழையும், கடனாநதி அணையில் 1 மி.மீ மழையும் பதிவாகியுள்ளது.

வியாழக்கிழமை பகலில் அம்பாசமுத்திரம், விக்கிரமசிங்கபுரம், பாபநாசம் பகுதியில் சாரல் மழை பெய்தது. திருநெல்வேலி மாவட்டத்தில் அணைகள் அமைந்துள்ள பகுதியில் தொடர்ந்து மேக மூட்டத்துடன் குளிர்ந்த காற்று வீசுவதால் தென்மேற்கு பருவ மழை தொடங்கி விட்டதாக கருதப்படுகிறது.

கடும் வெப்பம் நிலவி வந்ததால் அணைகளுக்கு நீர்வரத்து இல்லை. நீர்பிடிப்பு பகுதியில் சாரல் மழை பெய்து வருவதால் அணைகளின் நீர்வரத்தில் காணப்படுகிறது. வியாழக்கிழமை பாபநாசம் அணைக்கு விநாடிக்கு 300 கனஅடியும், மணிமுத்தாறு அணைக்கு விநாடிக்கு 75 கனஅடியும், கடனாநதி அணைக்கு விநாடிக்கு 60 கனஅடியும் நீர்வரத்து இருந்தது.

அணைகளின் நீர்மட்டம்: பாபநாசம் அணையின் நீர்மட்டம் 70.65 அடி, சேர்வலாறு அணையின் நீர்மட்டம் 79.07 அடி, மணிமுத்தாறு அணையின் நீர்மட்டம் 82 அடி, கடனாநதி அணையின் நீர்மட்டம் 48.20 அடி, ராமநதி அணையின் நீர்மட்டம் 38.75 அடி, கருப்பாநதி அணையின் நீர்மட்டம் 44 அடி, குண்டாறு அணையின் நீர்மட்டம் 14.76 அடி, அடவிநயினார் அணையின் நீர்மட்டம் 41.50 அடி, வடக்குப் பச்சையாறு அணையின் நீர்மட்டம் 27 அடி, நம்பியாறு அணையின் நீர்மட்டம் 12.70 அடி, கொடுமுடியாறு அணையின் நீர்மட்டம் 4 அடியாகவும் இருந்தது.

1,000 கனஅடி திறப்பு: கார் பருவ சாகுபடிக்கு அணைகளிலிருந்து தண்ணீர் திறக்கப் பட்டுள்ள நிலையில் வியாழக்கிழமை பாசனத்திற்கு பாபநாசம், சேர்வலாறு அணைகளில் இருந்து 1,000 கனஅடி தண்ணீர் திறக்கப்பட்டுள்ளது. மணிமுத்தாறு அணையிலிருந்து 75 கனஅடியும், கடனாநதி அணையிலிருந்து 60 கனஅடியும் தண்ணீர் திறந்து விடப்பட்டு்ள்ளது.

பருவ மழை தொடர்ந்து பெய்து நீர்வரத்து கிடைத்த பிறகுதான் இம்மாவட்டத்தில் பிற அணைகள் மூலம் பாசனம் பெறும் நிலங்களுக்கு தண்ணீர் திறக்கப்படும் என அணை வட்டாரங்கள் தெரிவித்தன.