நெல்லை மாவட்டத்தில் தொடரும் கோடை மழை!

திருநெல்வேலி மாவட்டத்தில் கோடை மழை நீடித்து வருவதால் வெப்பம் தணிந்து இதமான சூழல் நிலவி வருகிறது. சனிக்கிழமை பரவலாக மிதமான மழை பெய்தது.

வளி மண்டலத்தில் ஏற்பட்டுள்ள மேல் அடுக்கு சுழற்சி காரணமாக தமிழகத்தில் பரவலராக மழை பெய்து வருகிறது. இம்மாதம் 4 ஆம் தேதி கத்திரி வெயிலான அக்னிநட்சத்திரம் தொடங்கியுள்ள நிலையில் பெய்து வரும் கோடை மழையால் வெப்பம் தணிந்து காணப்படுகிறது.

மேற்குத் தொடர்ச்சி மலையில் திருநெல்வேலி மாவட்டத்தில் நீர்பிடிப்பு பகுதியில் பெய்து வரும் மழையால் குறைந்த கொள்ளளவை கொண்ட கடனாநதி, ராமநதி, கருப்பாநதி, அடவிநயினார் அணைகளின் நீர்மட்டம் உயர்ந்துள்ளது.

பிரதான அணைகளான பாபநாசம், சேர்வலாறு, மணிமுத்தாறு அணைகளுக்கும் தொடர்ந்து நீர்வரத்து இருப்பதால், அணைகளிலிருந்து முன் கார் பருவ சாகுபடி மற்றும் குடிநீர் தேவைக்காக தண்ணீர் திறக்கப்பட்ட போதிலும், நீர்மட்டம் குறையவில்லை.
திருநெல்வேலி மாவட்டத்தில் சனிக்கிழமை அம்பாசமுத்திரம், கல்லிடைக்குறிச்சி, வீரவநல்லூர், தென்காசி, செங்கோட்டை, குற்றாலம் உள்பட பரவலாக மிதமான மழை பெய்தது. மழையால் வெப்பம் இன்றி இதமான சூழல் நிலவியது.

அணைகளின் நீர்இருப்பு: சனிக்கிழமை காலை நிலவரப்படி பாபநாசம் அணையின் நீர்மட்டம் 69.60 அடி, சேர்வலாறு அணையின் நீர்மட்டம் 82.51 அடி, மணிமுத்தாறு அணையின் நீர்மட்டம் 82.80 அடி, கடனாநதி அணையின் நீர்மட்டம் 56.10 அடி, ராமநதி அணையின் நீர்மட்டம் 42 அடி, கருப்பாநதி அணையின் நீர்மட்டம் 41.01 அடி, அடவிநயினார் அணையின் நீர்மட்டம் 35 அடி, வடக்குப் பச்சையாறு அணையின் நீர்மட்டம் 23 அடியாகவும் இருந்தது.