இல்லத்தரசிகளே! இந்த 5 மினிட்ஸ் கிராஃப்ட்ஸ் எல்லாம் உங்களுக்கு வொர்க் அவுட் ஆகுதா?

இணையத்தில் உடனுக்குடன் பலன் தரக்கூடிய வகையிலான விடியோக்களுடன் கூடிய DIY கிராஃப்டுகள்  ஏராளமாகக் கொட்டிக் கிடக்கின்றன. கண் சிமிட்டும் நேரத்தில் அவற்றைச் செய்து முடித்து விடலாம் என்பது மாதிரியான விளம்பரங்கள் வேறு! சரி என்று அவற்றில் சிலவற்றை நான் முயன்று பார்த்தேன். சில எளிமையாகவே இருந்தன. ஆனால் அவற்றில் சிலவகையானவை நேர விரயம், பொருள் விரயம், பண விரயம் என்ற ரீதியிலும் இருக்கின்றன என்பதையும் ஒப்புக் கொள்ளத்தான் வேண்டும். இதோ இந்த விடியோக்களைப் பாருங்கள். காண்பதற்குத் தான் அவை எத்தனை எளிமை. அழகு! ஆனால், செய்து பார்த்தால் தானே தெரிகிறது. அவை ஒன்றும் அத்தனை எளிமை இல்லை என்று. சில வகை கிராஃப்டுகள் செய்து பார்க்கும் போது ஒரே தடவையில் ரிசல்ட் சரியானபடி வந்து விடுகிறது. சில வகை கிராப்டுகளில் பலமுறை செய்து பார்த்தால் தான் இறுதியாக சரியான ரிசல்ட் வருகிறது. சில நேரங்களில் அடச்சே... இது சரியாவே வர மாட்டேனென்கிறதே என்று புலம்ப வைத்து பிராணனை வாங்கத்தக்க கிராப்டுகளும் கூட இருக்கின்றன.

இங்கே பட்டியலிடப்பட்டுள்ளவை, நீங்கள் எளிமையாகச் செய்யக்கூடியவை மட்டுமல்ல சரியானபடி ரிசல்ட் தரக்கூடியவையும் கூட என்று நம்பலாம்.

சின்னக் குழந்தைகளுக்கு பால் அல்லது ஜூஸ் டம்ளரில் கொடுத்துப் பழக்கும் போது அவர்களால் அதைக் கொட்டாமல் குடிக்க இயலாது. அம்மாதிரியான நேரங்களில் இப்போதெல்லாம் பழங்களை வெட்டி பேக் செய்யப் பயன்படுத்தப்படும் ஒருவகை மெல்லிய பிளாஸ்டிக் ஷீட் கொண்டு டம்ளரைக் கவர் செய்து அதன் மேல் ஸ்ட்ராவால் சிறு துளையிட்டுக் கொடுத்து விட்டால் போதும். குழந்தைகள் கையில் தைரியமாக டம்ளரைத் தரலாம். 

குளிர்சாதனப் பெட்டிகளில் பயன்படுத்தக் கூடிய ஜிப்லாக் கவர்கள் பொருட்கள் குறைவாக இருந்தால் காற்று நிரம்பி அதிகப்படியான இடத்தை நிறைக்கும். அப்படியான சமயங்களில் ஜிப்லாக் கவர்களை மூடி அதனுள் ஒரு ஸ்ட்ராவைச் சொருகி உள்ளிருக்கும் காற்றை ஆன மட்டும் உறிஞ்சிவிட்டுப் பிறகு கவரை க்ளோஸ் செய்தால் போதும் கவர் அதனுள் இருக்கும் பொருட்களோடு ஒட்டிக் கொண்டு குளிர் சாதனப் பெட்டியில் நமக்குத் தேவையான இட வசதியை ஏற்படுத்தித் தரும்.

பெரிய மாத்திரைகளுடனான பட்டை காலியானதும் அதைக் கீழே விட்டெறியாமல் நன்றாகக் கழுவி சுத்தப்படுத்தி தண்ணீர் நிரப்பி ஃப்ரீஸரில் வைத்தால் குட்டி ஐஸ் கியூப் ப்ளேட்டுகளாகப் பயன்படுத்த உதவும்.

ஆரஞ்சுப் பழத்தில் இருந்து ஒரு சொட்டு ஜூஸ் கூட சிந்தாமல் சிதறாமல் டம்ளருக்கு சிஃப்ட் ஆக வேண்டுமானால் காலியான கூல் ட்ரிங் பெட் பாட்டிலின் வாய்ப்பகுதியைக் கட் செய்து அதை அப்படியே அந்தப் பழத்தின் மீது பொருத்தி கம் கொண்டு ஒட்டி விடுங்கள். இப்போது பெட் பாட்டில் வாய்பகுதி பழத்தில் ஒட்டி இருக்கும் பாகத்தில் பழத்தில் ஓட்டை இட்டோ அல்லது குடைந்து விட்டோ பழத்தைச் சாய்த்தால் போதும் ஜூஸ் அப்படியே வெளியில் வரும்... அதை டம்ளரில் சேகரித்தும் அருந்தலாம், அப்படியேவும் அருந்தலாம்.

குழந்தைகள் அடிக்கடி பள்ளியில் ஷார்ப்னர் மற்றும் ரப்பர்களைத் தொலைத்து விட்டு வந்து விடுகிறார்களா? கவலை வேண்டாம். சற்றுப் பெரிய ரப்பர் அல்லது எரேஸர்களை வாங்கி ஷார்ப்னர் அளவுக்கு அதை நறுக்கி விட்டு ஷார்ப்னர்களை அதில் ஒட்டிக் கொடுத்து விட்டால் போதும். குழந்தைகள் அவற்றைப் புழங்கவும் எளிதாக இருக்கும். அடிக்கடி அவை தொலைவதும் குறையும்.

அதிக நேரம் டெஸ்க் டாப் கம்ப்யூட்டர்கள் மற்றும் லேப் டாப்புகளில் மெளஸ் கொண்டு தேடும் வேலையா? அதனால் மணிக்கட்டை ஒட்டிய வலது கையின் கீழ்பகுதி தேய்ந்து போய் வலி ஏற்படுகிறதா? சிம்பிள் ட்ரிக் ஒன்று உள்ளது. வீட்டில் வேஸ்ட்டாக இருக்கும் பலூன்களில் ஒன்றில் நீர் நிரப்பி டைட்டாக மூடி ரப்பர் பேண்ட்டால் கட்டி விட்டு அதை மணிக்கட்டை ஒட்டிய கைப்பகுதிக்கு சப்போர்ட்டாக வைத்துக் கொண்டால் போச்சு. கை வலி போயே போச்சு. ரேகையும் தேயாது.

குண்டு பல்புகளில் டங்ஸ்டன் இழை அறுந்து பல்ப் எரியாது போனால் அதைக் கழட்டி அப்படியே வீசி விடத் தேவையில்லை. பல்புகளின் கீழ்ப்பகுதியில் துளையிட்டு உள்ளிருக்கும் வஸ்துக்களை கீழே கொட்டி விட்டு நன்றாகக் கழுவித் துடைத்து அதில் எண்ணெய் நிரப்பி திரியிட்டு மாடர்ன் அகல்விளக்குகளாகப் பயன்படுத்தலாம். பார்க்க கிளாஸிக்காக இருக்கும்.

நீங்கள் ஒரு அட்டைச் சோம்பேறி.. வீட்டில் யாருமில்லை. ஆனால் பசிக்கிறது. எழுந்து கிச்சனுக்குச் சென்று ஸ்டவ்வைப் பற்ற வைத்து வாணலியை அடுப்பில் ஏற்றி அதில் மேகி பாக்கெட்டை உடைத்துப் போட்டு நீர் ஊற்றி நூடுல்ஸ் செய்து சாப்பிடவெல்லாம் மனமில்லை என்று வைத்துக் கொள்ளுங்கள், உங்களுக்கொரு சிம்பிள் டிப்ஸ். வீட்டில் இன்ஸ்டண்ட் காபி மேக்கர் இருக்கிறதா? அதை எடுங்கள் அதில் நூடுல்ஸை உடைத்துப் போட்டு டேஸ்ட் மேக்கர் சேர்த்து கொஞ்சம் தண்ணீர் விட்டு ஆன் செய்யுங்கள். நூடுல்ஸ் தயாரானதும் அதுவே ஆஃப் ஆகி விடும். தண்ணீர் அளவாக விட்டிருந்தால் அப்படியே எடுத்து பிளேட்டில் வைத்து சாப்பிட வேண்டியது தான். 

இப்படியான கிராஃப்டுகள் உருப்படியானவை மட்டுமல்ல பயன் தரக்கூடியவையும் கூட.  எனவே இணையத்தில் கொட்டிக் கிடக்கிறதே என்று எல்லாவிதமான கிராப்டுகளையும் முயன்று பார்த்து விடத் துடிக்காமல் எவையெவை நமக்குத் தேவையோ அவற்றை மட்டுமே முயன்று நேரம், பொருள், பணம் மூன்றையும் விரயமாக்காமல் தெளிவாக இருங்கள்.

டொமெட்டோ கெச்சப் பாக்கெட்டுகள் அதிகமாக மீந்து விட்டால் என்ன செய்வது?

டூத்பேஸ்ட் மேஜிக்... பல் துலக்க மட்டுமல்ல, இப்படியும் பயன்படுத்தலாம்!

ஆட்டோமேடிக் போண்டா மேக்கர்...

கோவையில் மத்தியதர வர்க்க இல்லத்தரசிகளை குஷிப்படுத்தி வரும் ரூ 2,500 மலிவு விலை வாஷிங் மெஷின்!

செங்கல் செங்கல்லாக கெமிக்கல் சோப் எதற்கு? ஹோம்மேட் ‘நேச்சுரல் பாடி வாஷ்’ தயாரிக்க கத்துக்கோங்க பாஸ்!