திமிரி குமரகிரி சுப்பிரமணி சுவாமி கோயில் மலைக்கு மலைச்சாலை அமைக்கும் பணி: அமைச்சா் சேவூா் எஸ்.ராமச்சந்திரன் தொடங்கி வைத்தாா்

திமிரி குமரகிரி சுப்பிரமணி சுவாமி கோயில் மலைக்கு ரூ.3.76 கோடி மதிப்பீட்டில் புதிய பாதை அமைக்கும் பணியை தமிழ்நாடு அரசின் இந்து சமய அறநிலையத் துறை அமைச்சா் சேவூா் எஸ்.ராமச்சந்திரன் வெள்ளிக்கிழமை அடிக்கல் நாட்டி தொடங்கி வைத்தாா்.

ராணிப்பேட்டை மாவட்டம், திமிரி பேரூராட்சியில், மலை உச்சியில் அமைந்துள்ள இக்கோயிலுக்கு செல்வதற்கு பக்தா்கள் 365 படிகளைக் கடந்து செல்ல வேண்டியுள்ளது. முதியோா், குழந்தைகள், மாற்றுத் திறனாளிகள் மற்றும் உடல்நலம் குன்றியோா் படிகள் வழியாக மலைக்குச் செல்ல சிரமப்படுகின்றனா்.

எனவே இக்கோயிலை அடைய மலைச்சாலை அமைத்து தர வேண்டும் என்பது ராணிப்பேட்டை மாவட்ட பக்தா்களின் நீண்ட நாள் கோரிக்கை. இதை ஏற்று, மலைக் கோயிலுக்கு புதிய சாலை அமைப்பதற்காக அறநிலையத் துறை சாா்பில் ரூ.3.76 கோடி ஒதுக்கப்பட்டது.

இந்நிலையில், மலைச்சாலை அமைக்கும் பணிக்கான பூமி பூஜை, கோயில் மலையடிவாரத்தில் வெள்ளிக்கிழமை நடைபெற்றது. இந்த நிகழ்வுக்கு ராணிப்பேட்டை ஆட்சியா் ஏ.ஆா்.கிளாட்ஸ்டன் புஷ்பராஜ் தலைமை வகித்தாா். இந்து சமய அறநிலையத்துறை அமைச்சா் சேவூா் எஸ்.ராமச்சந்திரன், மலைப்பாதை அமைக்கும் பணிக்கான பூமி பூஜையில் பங்கேற்று, சாலை அமைக்கும் பணிகளைத் தொடங்கி வைத்தாா்.

இச்சாலை 900 மீட்டா் நீளமும் 5.50 மீட்டா் அகலமும் கொண்டிருக்கும். 4 சிறுபாலங்களுடன் சாலை அமைக்கும் பணியை விரைந்து முடிக்குமாறு அலுவலா்கள் மற்றும் ஒப்பந்ததாா்களுக்கு அமைச்சா் உத்தரவிட்டாா்.

பூமி பூஜையில் பக்தா்கள், அறநிலையத் துறையின் வேலூா் இணை ஆணையா் சே.மாரிமுத்து, உதவி ஆணையா் பா.விஜயா மற்றும் மாவட்ட அறங்காவலா் குழுவின் தலைவா் வி.முரளி, குழு உறுப்பினா்கள் மற்றும் அரசு அதிகாரிகள் கலந்து கொண்டனா்.