சையத் முஷ்டாக் அலி டி20: தினேஷ் கார்த்திக், ஜெகதீசன் அதிரடியால் ஹைதராபாத்தை வீழ்த்திய தமிழக அணி

தினேஷ் கார்த்திக், ஜெகதீசனின் அதிரடி ஆட்டத்தால் ஹைதராபாத்தை வீழ்த்தியுள்ளது தமிழக அணி.

கொல்கத்தாவில் நடைபெற்ற சையத் முஷ்டாக் அலி கோப்பைக்கான டி20 ஆட்டத்தில் முதலில் விளையாடிய ஹைதராபாத் அணி, 20 ஓவர்களில் 7 விக்கெட் இழப்புக்கு 152 ரன்கள் எடுத்தது. 8-வது விக்கெட்டுக்கு ஜோடி சேர்ந்த தானே தியாகராஜன் 6 பந்துகளில் 16 ரன்களும் மிலிந்த் 11 பந்துகளில் 24 ரன்களும் எடுத்து கெளரவமான ஸ்கோரைப் பெற்றுத் தந்தார்கள். 

மிகவும் பரபரப்பான முறையில் நடந்த இந்த ஆட்டத்தில் கடைசி ஓவரில் வெற்றியை அடைந்தது தமிழக அணி. தொடக்க வீரர் ஜெகதீசன் 51 பந்துகளில் 5 சிக்ஸர்கள், 4 பவுண்டரிகளுடன் 78 ரன்களும் தினேஷ் கார்த்திக் 30 பந்துகளில் 2 சிக்ஸர்கள், 2 பவுண்டரிகளுடன் 40 ரன்களும் எடுத்துக் கடைசி வரை ஆட்டமிழக்காமல் இருந்தார்கள். தமிழக அணி 19.3 ஓவர்களில் 3 விக்கெட் இழப்புக்கு 155 ரன்கள் எடுத்து வெற்றி பெற்றது. 

இதுவரை விளையாடிய நான்கு ஆட்டங்களிலும் தமிழக அணி வெற்றி பெற்றுள்ளது.