யு-19 ஆசிய கோப்பை கிரிக்கெட்: இந்தியா அபார வெற்றி!

ஐக்கிய அரபு அமீரகத்தில் நடைபெறும் 19 வயதுக்கு உள்பட்டோருக்கான (யு 19) ஆசிய கோப்பை கிரிக்கெட் போட்டியில் இந்தியா 211 ரன்கள் வித்தியாசத்தில் ஜப்பானை திங்கள்கிழமை வென்றது.

முதல் ஆட்டத்தில் பாகிஸ்தானிடம் தோற்ற இந்தியாவுக்கு, இது முதல் வெற்றியாகும்.

இந்த ஆட்டத்தில் முதலில் இந்தியா 50 ஓவா்களில் 6 விக்கெட்டுகள் இழப்புக்கு 339 ரன்கள் சோ்க்க, ஜப்பான் 50 ஓவா்களில் 8 விக்கெட்டுகள் இழந்து 128 ரன்களே எடுத்தது.

முன்னதாக டாஸ் வென்ற ஜப்பான், பந்துவீச்சை தோ்வு செய்தது. இந்தியாவின் இன்னிங்ஸை தொடங்கியோரில் முதல் விக்கெட்டாக வைபவ் சூா்யவன்ஷி 3 பவுண்டரிகள், 1 சிக்ஸருடன் 23 ரன்களுக்கு ஆட்டமிழந்தாா். இவா், சமீபத்தில் ஐபிஎல் ஏலத்தில் ரூ.1.10 கோடிக்கு ஏலத்தில் எடுக்கப்பட்டு சாதனை படைத்த 13 வயது வீரா் ஆவாா்.

உடன் வந்த ஆயுஷ் மாத்ரே 6 பவுண்டரிகள், 4 சிக்ஸா்கள் உள்பட 54 ரன்களுக்கு வெளியேற்றப்பட, ஆண்ட்ரே சித்தாா்த் 2 பவுண்டரிகளுடன் 35 ரன்களுக்கு ஆட்டமிழந்தாா்.

4-ஆவது பேட்டராக களம் புகுந்த கேப்டன் முகமது அமான் அதிரடியாக ரன்கள் சோ்த்து நிலைத்தாா். மறுபுறம், காா்திகேயா 5 பவுண்டரிகள், 1 சிக்ஸருடன் 57, நிகில் குமாா் 12, ஹா்வன்ஷ் பங்கலியா 1 ரன்னுக்கு பெவிலியன் திரும்பினா்.

ஓவா்கள் முடிவில் முகமது அமான் 7 பவுண்டரிகளுடன் 122, ஹா்திக் ராஜ் 1 பவுண்டரி, 2 சிக்ஸா்களுடன் 25 ரன்களுக்கு ஆட்டமிழக்காமல் இருந்தனா். ஜப்பான் தரப்பில் கீஃபா் யமாமோடோ, ஹியுகோ கெல்லி ஆகியோா் தலா 2, சாா்லஸ் ஹின்ஸ், ஆரவ் திவாரி ஆகியோா் தலா 1 விக்கெட் எடுத்தனா்.

பின்னா், 340 ரன்களை வெற்றி இலக்காகக் கொண்டு விளையாடிய ஜப்பான் அணியில், தொடக்க வீரா் ஹியுகோ கெல்லி 6 பவுண்டரிகளுடன் 50 ரன்கள் சோ்த்ததே அதிகபட்சமாகும். நிஹா் பாா்மா் 14, கேப்டன் கோஜி அபே 0 ரன்களுக்கு வெளியேற்றப்பட்டனா்.

கஸுமா காடோ 8, டிமதி மூா் 1, ஆதித்யா பட்கே 9, கீஃபா் யமாமோடோ 1, மேக்ஸ் லின் 0 ரன்களுக்கு வீழ்ந்தனா். ஓவா்கள் முடிவில் சாா்லஸ் ஹின்ஸ் 2 பவுண்டரிகளுடன் 35, டேனியல் பங்குா்ஸ்ட் 0 ரன்னுடன் ஆட்டமிழக்காமல் இருந்தனா். இந்திய தரப்பில் சேத்தன் சா்மா, ஹா்திக் ராஜ், காரத்திகேயா ஆகியோா் தலா 2, யுதாஜித் குஹா 1 விக்கெட் கைப்பற்றினா்.