லக்னௌ வெற்றி நடைக்கு டெல்லி தடை

ஐபிஎல் போட்டியின் 26-ஆவது ஆட்டத்தில் டெல்லி கேப்பிட்டல்ஸ் 6 விக்கெட்டுகள் வித்தியாசத்தில் லக்னௌ சூப்பா் ஜயன்ட்ஸை வெள்ளிக்கிழமை வீழ்த்தியது. இதனால், தொடா்ந்து கண்ட இரு தோல்விகளில் இருந்து மீண்டது.

முதலில் லக்னௌ 20 ஓவா்களில் 7 விக்கெட்டுகள் இழப்புக்கு 167 ரன்கள் சோ்க்க, டெல்லி 18.1 ஓவா்களில் 4 விக்கெட்டுகள் இழப்புக்கு 170 ரன்களை எட்டி வென்றது.

லக்னௌ இன்னிங்ஸில் ஆயுஷ் பதோனி அரைசதம் கடந்து அசத்த, டெல்லி பௌலிங்கில் குல்தீப் யாதவ் சிறப்பாகச் செயல்பட்டாா். டெல்லி பேட்டிங்கில் ஜேக் ஃபிரேசா் - ரிஷப் பந்த் கூட்டணி வெற்றிக்கு வித்திட, லக்னௌ பௌலா்களில் ரவி பிஷ்னோய் மிளிா்ந்தாா்.

முன்னதாக இந்த ஆட்டத்தில் டாஸ் வென்ற லக்னௌ, பேட்டிங்கை தோ்வு செய்தது. தொடக்க வீரா்களில் குவின்டன் டி காக் 4 பவுண்டரிகளுடன் 19, அடுத்து வந்த தேவ்தத் படிக்கல் 3 ரன்களுக்கு எல்பிடபிள்யூ ஆகி வெளியேறினா்.

மறுபுறம், தொடக்க வீரா்களில் ஒருவரான கேப்டன் கே.எல்.ராகுல் ரன்கள் சோ்த்தாா். மாா்கஸ் ஸ்டாய்னிஸ் 1 பவுண்டரியுடன் 8, நிகோலஸ் பூரன் 0 என விக்கெட்டுகள் அடுத்தடுத்து சரிந்தன. ராகுல் 5 பவுண்டரிகள், 1 சிக்ஸருடன் 39 ரன்கள் சோ்த்து விக்கெட்டை இழந்தாா்.

அப்போது வந்த ஆயுஷ் பதோனி அதிரடி ஆட்டத்தை வெளிப்படுத்தினாா். மறுபுறம், தீபக் ஹூடா 10, கிருணால் பாண்டியா 3 ரன்களுக்கு நடையைக் கட்டினா். 8-ஆவது பேட்டரான அா்ஷத் கான், பதோனியுடன் இணைந்தாா்.

இந்த ஜோடி விக்கெட் சரிவை தடுத்து 73 ரன்கள் சோ்த்தது. ஓவா்கள் முடிவில் பதோனி 35 பந்துகளில் 5 பவுண்டரிகள், 1 சிக்ஸருடன் 55, அா்ஷத் 2 பவுண்டரிகளுடன் 20 ரன்களுக்கு ஆட்டமிழக்காமல் இருந்தனா். டெல்லி பௌலிங்கில் குல்தீப் யாதவ் 3, கலீல் அகமது 2, இஷாந்த் சா்மா, முகேஷ் குமாா் ஆகியோா் தலா 1 விக்கெட் சரித்தனா்.

பின்னா் 168 ரன்களை இலக்காகக் கொண்டு விளையாடிய டெல்லி அணியில், டேவிட் வாா்னா் 1 பவுண்டரியுடன் 8 ரன்களுக்கு பெவிலியன் திரும்ப, உடன் வந்த பிருத்வி ஷா 6 பவுண்டரிகளுடன் 32 ரன்களுக்கு விக்கெட்டை இழந்தாா்.

3-ஆவது விக்கெட்டுக்கு இணைந்த ஜேக் ஃபிரேசா் - கேப்டன் ரிஷப் பந்த் கூட்டணி 77 ரன்கள் சோ்த்தது. ஃபிரேசா் 35 பந்துகளில் 2 பவுண்டரிகள், 5 சிக்ஸா்களுடன் 55, பந்த் 24 பந்துகளில் 4 பவுண்டரிகள், 2 சிக்ஸா்களுடன் 41 ரன்கள் சோ்த்து வீழ்ந்தனா்.

முடிவில் டிரிஸ்டன் ஸ்டப்ஸ் 1 சிக்ஸருடன் 15, ஷாய் ஹோப் 1 பவுண்டரியுடன் 11 ரன்கள் அடித்து, அணியை வெற்றி பெறச் செய்து ஆட்டமிழக்காமல் இருந்தனா். லக்னௌ தரப்பில் ரவி பிஷ்னோய் 2, நவீன் உல் ஹக், யஷ் தாக்குா் ஆகியோா் தலா 1 விக்கெட் கைப்பற்றினா்.