விராட் கோலியின் அறிவுரை தனது ஆட்டத்தை சிறப்பாக மாற்றியதாக ராஜஸ்தான் ராயல்ஸ் அணியின் ரியான் பராக் தெரிவித்துள்ளார்.
ஜியோ சினிமாவுக்கு பேட்டியளித்த அவர் இதனை தெரிவித்தார்.
இது தொடர்பாக அவர் பேசியதாவது: எனது இரண்டாவது ஆண்டில், அந்த ஆண்டு ஐபிஎல் தொடர் எனக்கு மோசமானதாக அமைந்தது. எனது மோசமான ஃபார்மிலிருந்து எப்படி வெளியில் வருவது என விராட் கோலியிடம் கேட்டேன். இதுபோன்ற கடினமான சூழலில் இருந்தபோது நீங்கள் என்ன செய்தீர்கள் எனக் கேட்டேன்.
அவர் எனக்காக 10-15 நிமிடங்கள் ஒதுக்கி அவருடைய அனுபவங்களை என்னுடன் பகிர்ந்து கொண்டு சில அறிவுரைகளை எனக்கு வழங்கினார். அவரது அறிவுரைகள் உண்மையில் எனக்கு மிகவும் உதவியாக இருந்தது என நினைக்கிறேன் என்றார்.
நடப்பு ஐபிஎல் தொடரில் சிறப்பான ஆட்டத்தை வெளிப்படுத்தி வரும் ரியான் பராக் 318 ரன்கள் எடுத்து அதிக ரன்கள் எடுத்தவர்கள் பட்டியலில் 3-வது இடத்தில் உள்ளது குறிப்பிடத்தக்கது.
