தென் ஆப்பிரிக்க டி20 தொடருக்கான இந்திய அணி அறிவிப்பு: அணிக்குத் திரும்பினார் சுரேஷ் ரெய்னா

தென் ஆப்பிரிக்கா சுற்றுப்பயணம் செய்துள்ள இந்திய அணி அங்கு 3 போட்டிகள் கொண்ட டெஸ்ட், 6 ஒருநாள் போட்டிகள் மற்றும் 3 டி20 போட்டிகளில் பங்கேற்று விளையாடுகிறது.

இதில் சமீபத்தில் நடந்த டெஸ்ட் தொடரை 2-1 என்ற கணக்கில் தென் ஆப்பிரிக்கா கைப்பற்றியது. இதையடுத்து 6 போட்டிகள் கொண்ட ஒருநாள் தொடர் நடைபெறுகிறது. பின்னர் 3 போட்டிகள் கொண்ட டி20 தொடரில் இரு அணிகளும் மேதவுள்ளன.

பிப்ரவரி 18 ஜோஹன்னஸ்பர்க்கில் முதல் டி20, பிப்ரவரி 21 செஞ்சூரியனில் 2-ஆவது டி20, பிப்ரவரி 24 கேப்டவுனில் 3-ஆவது டி20 போட்டிகள் நடைபெறவுள்ளன. இதற்கான இந்திய அணி ஞாயிற்றுக்கிழமை அறிவிக்கப்பட்டுள்ளது. இதில் சுரேஷ் ரெய்னா இடம்பிடித்துள்ளார்.

கடைசியாக கடந்த ஆண்டு பிப்ரவரி மாதம் இங்கிலாந்துக்கு எதிரான டி20 போட்டிக்குப் பிறகு சுமார் ஒரு வருடத்துக்குப் பின்னர் சுரேஷ் ரெய்னா இந்திய அணிக்குத் திரும்பியுள்ளார். சையது முஷ்டாக் அலி டி20 தொடரில் ஒரு சதம், 2 அரை சதங்கள் உட்பட 314 ரன்களைக் குவித்துள்ளார்.

டி20 தொடருக்கான இந்திய அணி வீரர்கள் விவரம் பின்வருமாறு:

விராட் கோலி (கேப்டன்), ரோஹித் ஷர்மா, ஷிகர் தவன், கே.எல்.ராகுல், சுரேஷ் ரெய்னா, மகேந்திர சிங் தோனி (விக்கெட் கீப்பர்), தினேஷ் கார்த்திக், ஹார்திக் பாண்டியா, மணீஷ் பாண்டே, அக்ஷர் படேல், யசுவேந்திர சாஹல், குல்தீப் யாதவ், புவனேஸ்வர் குமார், ஜஸ்ப்ரீத் பும்ரா, ஜயதேவ் உனாட்கட், ஷர்துல் தாக்கூர்.