3-வது டி20: ஆஸ்திரேலிய அணியில் பிரபல வீரர் சேர்ப்பு!

கேப்டன் விராட் கோலி தலைமையிலான இந்திய அணி 4 டெஸ்ட், 3 ஒருநாள், 3 டி20 ஆட்டங்கள் கொண்ட தொடர்களில் பங்கேற்க ஆஸ்திரேலியாவுக்குச் சென்றுள்ளது.

முதல் டி20 ஆட்டத்தை ஆஸ்திரேலியா அணி நான்கு ரன்கள் வித்தியாசத்தில் வென்றது. நேற்று நடைபெற்ற 2-வது டி20 ஆட்டத்தில் ஆஸி. அணி 7 விக்கெட் இழப்புக்கு 132 ரன்களை எடுத்தது. ஆனால் இடையில் மழையால் ஆட்டம் பாதிக்கப்பட்டதால் 11 ஓவர்களாக குறைக்கப்பட்டு 90 ரன்கள் வெற்றி இலக்கு நிர்ணயிக்கப்பட்டது. பிறகு 5 ஓவர்களாகவும் குறைக்கப்பட்டது. ஆனால் தொடர் மழையால் ஆட்டம் கைவிடப்பட்டதாக அறிவிக்கப்பட்டது. டி20 தொடரில் 1-0 என ஆஸ்திரேலிய அணி முன்னிலை வகித்து வருகிறது. கடைசி டி20 ஆட்டம் ஞாயிறன்று சிட்னியில் நடைபெறவுள்ளது. இதற்குப் பிறகு டெஸ்ட் தொடர் டிசம்பர் 6 அன்று தொடங்கவுள்ளது. 

இந்நிலையில், காயம் காரணமாக டி20 தொடரிலிருந்து விலகியுள்ள பில்லி ஸ்டேன்லேக்-குக்குப் பதிலாக பிரபல வீரர் மிட்செல் ஸ்டார்க் கடைசி டி20 ஆட்டத்துக்குச் சேர்க்கப்பட்டுள்ளார். அவர் கடைசியாக 2016 செப்டம்பரில் சர்வதேச டி20 ஆட்டத்தில் விளையாடினார். அதன்பிறகு நாளைதான் ஆஸி. அணியில் இடம்பெறவுள்ளார். மேலும் ஆஸ்திரேலிய மண்ணில் 2014 பிப்ரவரியில் கடைசியாக சர்வதேச டி20-யில் விளையாடினார். டெஸ்ட் போட்டியில் அதிகக் கவனம் செலுத்துவதால் டி20 ஆட்டங்களில் ஸ்டார்க் அதிகக் கவனம் செலுத்துவதில்லை.