பாகிஸ்தானுக்கு எதிரான தொடர்கள்: ஒரு வெற்றியும் பெறாமல் நாடு திரும்பிய ஆஸ்திரேலிய அணி

பாகிஸ்தானுக்கு எதிராக இரண்டு டெஸ்டுகள், 3 டி20 ஆட்டங்களில் விளையாடுவதற்காகக் கடந்த மாதம் துபை வந்தது ஆஸ்திரேலிய அணி.

இரு டெஸ்டுகள் கொண்ட டெஸ்ட் தொடரில் 1-0 என பாகிஸ்தான் வென்றது. முதல் டெஸ்டைப் போராடி டிரா செய்து பாராட்டைப் பெற்றது ஆஸ்திரேலிய அணி.

பிறகு ஐக்கிய அரபு அமீரகத்துக்கு எதிரான ஒரு டி20 ஆட்டத்தில் மட்டும் வெற்றி பெற்றது ஆஸ்திரேலிய அணி.

பிறகு 3 ஆட்டங்கள் கொண்ட டி20 தொடர் நடைபெற்றது. இதிலும் பாகிஸ்தான் அணி ஆதிக்கம் செலுத்தியது. 3-0 என வெற்றி கண்டுள்ளது பாகிஸ்தான் அணி.

நேற்று நடைபெற்ற டி20 ஆட்டத்தில் முதல் விளையாடிய பாகிஸ்தான் அணி, 5 விக்கெட் இழப்புக்கு 150 ரன்கள் எடுத்தது. பிறகு விளையாடிய ஆஸ்திரேலிய அணி 117 ரன்களுக்கு அனைத்து விக்கெட்டுகளையும் இழந்தது. இதையடுத்து டி20 தொடரில் 3-0 என முழு வெற்றியடைந்துள்ளது பாகிஸ்தான் அணி. 

இதனால் பாகிஸ்தானுக்கு எதிராக டெஸ்ட், டி20 என இரு தொடர்களிலும் ஒரு வெற்றியும் பெறாமல் நாடு திரும்பியுள்ளது ஆஸ்திரேலிய அணி. 

அடுத்ததாக, இந்தியாவுக்கு எதிரான தொடர்களில் பங்கேற்கிறது ஆஸ்திரேலிய அணி.