டெஸ்ட் ஆல்ரவுண்டர்கள் தரவரிசை: முதல் 10 இடங்களில் மூன்று இங்கிலாந்து வீரர்கள்

பாகிஸ்தானுக்கு எதிரான முதல் டெஸ்டில் 3 விக்கெட் வித்தியாசத்தில் வென்றது இங்கிலாந்து அணி. இதையடுத்து ஐசிசி டெஸ்ட் தரவரிசைப் பட்டியலில் ஆல்ரவுண்டர்களுக்கான பிரிவில் முதல் 10 இடங்களில் மூன்று இங்கிலாந்து வீரர்கள் உள்ளார்கள்.

டெஸ்ட் ஆல்ரவுண்டர்கள் வரிசையில் முதல் இடத்தில் பென் ஸ்டோக்ஸ் உள்ளார். 7-ம் இடத்தில் வோக்ஸூம் 10-ம் இடத்தில் பிராடும் உள்ளார்கள். இந்தப் பட்டியலில் வோக்ஸ் இரு இடங்களும் பிராட் ஒரு இடமும் முன்னேறியுள்ளார்கள். இதனால் வலுவான ஆல்ரவுண்டர்கள் உள்ள அணியாக உள்ளது இங்கிலாந்து.

இந்திய வீரர்கள் ஜடேஜா மற்றும் அஸ்வின் ஆகியோர் இப்பட்டியலில் முறையே 3-ம் மற்றும் 5-ம் இடங்களைப் பிடித்துள்ளார்கள். 

மேற்கிந்தியத் தீவுகள் அணிக்கு எதிரான 3-வது டெஸ்டை வென்றதன் மூலம் விஸ்டன் கோப்பையைக் கைப்பற்றிய இங்கிலாந்து அணி, உலக டெஸ்ட் சாம்பியன்ஷிப் புள்ளிப் பட்டியலில் 3-வது இடத்துக்கு முன்னேறியது. இந்த டெஸ்ட் தொடர் ஆரம்பிப்பதற்கு முன்பு 146 புள்ளிகளுடன் 4-ம் இடத்தில் இருந்தது. ஆனால் இரு டெஸ்டுகளில் வெற்றி பெற்று 80 புள்ளிகளைச் சேர்த்துக்கொண்டது. இதனால் 226 புள்ளிகளுடன் இந்தியா (360), ஆஸ்திரேலியா (296) ஆகிய அணிகளுக்கு அடுத்ததாக 3-ம் இடத்தைப் பிடித்தது. பாகிஸ்தானுக்கு எதிரான முதல் டெஸ்டில் வெற்றி பெற்றதன் மூலம் கூடுதலாக 40 புள்ளிகளைப் பெற்று தற்போது 266 புள்ளிகளுடன் தொடர்ந்து 3-வது இடத்தில் இங்கிலாந்து அணி உள்ளது. இன்னொரு டெஸ்டில் வெற்றி பெற்றால் ஆஸ்திரேலிய அணியைப் பின்னுக்குத் தள்ளி 2-ம் இடத்தை இங்கிலாந்து அணி பிடித்துவிடும்.