இங்கிலாந்து முன்னாள் வீரர் ஜான் எட்ரிச் காலமானார்

இங்கிலாந்து அணிக்காக 77 டெஸ்டுகள் விளையாடிய ஜான் எட்ரிச் காலமானார். அவருக்கு வயது 83.

1963 முதல் 1976 வரை இங்கிலாந்து அணிக்காக விளையாடிய எட்ரிச், இடது கை ஆட்டக்காரராக முத்திரை பதித்தவர். வயது மூப்பு காரணமாக வடக்கு ஸ்காட்லாந்தில் அவர் காலமாகியுள்ளார். 

77 டெஸ்டுகளில் 5138 ரன்கள் எடுத்துள்ளார். சராசரி - 43.54. 1970-71 ஆஷஸ் தொடரில் 2 சதங்களுடன் 648 ரன்கள் எடுத்து 2-0 என இங்கிலாந்து அணி வெற்றி பெறுவதற்கு முக்கியக் காரணமாக இருந்தார். டெஸ்டில் 12 சதங்களும் 24 அரை சதங்களும் எடுத்துள்ளார். 1965-ல் நியூசிலாந்துக்கு எதிராக அதிகபட்சமாக 310 ரன்கள் எடுத்தார். 

7 ஒருநாள் ஆட்டங்களில் விளையாடிய எட்ரிச், முதல் சர்வதேச ஒருநாள் ஆட்டத்தில் விளையாடி, முதல் பவுண்டரியை அடித்து, முதல் ஆட்ட நாயகன் விருதையும் பெற்றுள்ளார். அந்த ஆட்டத்தில் 82 ரன்கள் எடுத்தார்.

எட்ரிச்சின் மறைவுக்கு இங்கிலாந்து கிரிக்கெட் வாரியம் இரங்கல் தெரிவித்துள்ளது.