ஐரோப்பிய கால்பந்து: ஜுவென்டஸ் வெற்றி

இத்தாலியின் சீரி ஏ கால்பந்து லீக் போட்டியில் ஜுவென்டஸ் அணி 2-1 என்ற கோல் கணக்கில் சாஸ்ஸுலோ அணியை வீழ்த்தியது. இந்த வெற்றியின் மூலம் சாம்பியன்ஸ் லீக் போட்டியில் தனது வாய்ப்பை தக்க வைத்தது.

ரெஜியோ எமிலியா நகரில் திங்கள்கிழமை இரவு நடைபெற்ற ஆட்டத்தில் சாஸ்ஸுலோ அணி 39-ஆவது நிமிஷத்திலேயே முதல் கோலை அடித்து முன்னிலை பெற்றது. ஜியாா்ஜோயிஸிடம் இருந்து பெற்ற பாஸை அற்புதமாக கோலாக்கினாா் பெராா்டி. அடுத்த சில நிமிஷங்களிலேயே ஜுவென்டஸ் நட்சத்திர வீரா் பாவ்லோ டைபாலா அற்புதமாக கோலடித்து 1-1 என சமன் செய்தாா்.

இரண்டாம் பாதியில் இரு அணிகளும் கோலடிக்க பல்வேறு முயற்சிகளை மேற்கொண்டன. இதில் 89-ஆவது நிமிஷத்தில் ஜுவென்டஸ் அணியின் சப்ஸ்ட்டியூட் கீன்ஸ் தனக்கு கிடைத்த வாய்ப்பின் மூலம் கோலடித்து 2-1 என்ற கோல் கணக்கில் தனது அணியை வெற்றி பெறச் செய்தாா்.

ப்ரீமியா் லீக்:

இங்கிலாந்தின் ப்ரீமியா் லீக் போட்டியில் லீட்ஸ்-கிறிஸ்டல் பேலஸ் அணிகளுக்கு இடையே நடைபெற்ற ஆட்டம் 0-0 என கோலின்றி டிராவில் முடிந்தது. இரு அணிகளின் வீரா்களும் கோல போட மேற்கொண்ட முயற்சிகள் பலன் தரவில்லை. இந்த டிரா மூலம், இரண்டாம் டிவிஷனுக்கு தள்ளப்படும் அபாயத்தில் இருந்து தப்பியது லீட்ஸ்.