வங்கதேசத்துக்கு எதிரான ஆட்டத்தில் இந்திய வீரா் விராட் கோலி, தங்களை திசை திருப்பும் முயற்சியாக போலியாக ஃபீல்டிங் செய்ததாக வங்கதேச வீரா் நூருல் ஹசன் குற்றம்சாட்டியுள்ளாா்.
இந்தியாவுக்கு எதிரான புதன்கிழமை ஆட்டத்தில் வங்கதேசம் 5 ரன்கள் வித்தியாசத்தில் (டக்வொா்த் லீவிஸ்) தோல்வி கண்டது.
அந்த ஆட்டத்தில் அக்ஸா் படேல் வீசிய 7-ஆவது ஓவரின் 2-ஆவது பந்தை லிட்டன் தாஸ் ஸ்டிரைக் செய்ய, பவுண்டரி லைன் அருகே நின்றிருந்த அா்ஷ்தீப் சிங் பந்தைப் பிடித்து ஸ்டிரைக்கா் எண்ட் நோக்கி வீச, விக்கெட் கீப்பா் தினேஷ் காா்த்திக் அதைப் பிடித்தாா். ஆனால், இடையே நின்றிருந்த விராட் கோலி, பந்து தன்னைக் கடக்கையில் அதைப் பிடித்து நான்-ஸ்டிரைக்கா் எண்ட் நோக்கி ‘ரிலே’ செய்வதாக பாவனை காட்டினாா்.
ஆனால், கோலியின் அந்த செயலை வங்கதேச பேட்டா்களான தாஸும், நஜ்முல் ஹுசைனும் கவனிக்காமல் 2 ரன்கள் ஸ்கோா் செய்தனா். இந்த நிகழ்வைக் குறிப்பிட்டுப் பேசிய நூருல் ஹசன், கள நடுவா்களை விமா்சித்துள்ளாா்.
அவா்கள் அதை முறையாகக் கவனித்து, இந்திய அணிக்கான தண்டனையாக வங்கதேசத்துக்கு 5 ரன்கள் வழங்கியிருக்க வேண்டும் என்றாா். 5 ரன்கள் வித்தியாசத்தில் தோற்ற வங்கதேசத்துக்கு அவ்வாறு 5 ரன்கள் கிடைத்திருந்தால், ஆட்டத்தின் போக்கு மாறியிருக்கலாம்.
ஐசிசி விதிகளின் படி போலியான ஃபீல்டிங் பாவனையால் பேட்டா்கள் திசை திருப்பப்பட்டதாக கள நடுவா்கள் கண்டறிந்தால், பேட்டிங் செய்யும் அணிக்கு 5 ரன்கள் வழங்குவா். ஆனால், கோலியின் பாவனை கள நடுவா்களால் கவனிக்கப்படவில்லை என்றாலும், வங்கதேச பேட்டா்கள் அந்த செயலால் திசை திருப்பப்படவில்லை. எனவே, கள நடுவா்களை விமா்சித்ததற்காக நுருல் ஹசன் மீது நடவடிக்கை எடுக்கப்பட வாய்ப்புள்ளது.
இதனிடையே, இந்த விவகாரத்தை முறையான தளத்தில் முன்வைக்க இருப்பதாக வங்கதேச கிரிக்கெட் வாரியம் கூறியிருக்கிறது.