அஸ்வினுக்கு உதயநிதி ஸ்டாலின் பாராட்டு!

ஆஸ்திரேலியாவுக்கு எதிரான டெஸ்ட் தொடரில் சிறப்பாகப் பந்துவீசி தரவரிசையில் நெ.1  இடம் பிடித்த ஆர். அஸ்வினுக்கு உதயநிதி ஸ்டாலின் பாராட்டு தெரிவித்துள்ளார்.

ஆஸ்திரேலியாவுக்கு எதிரான டெஸ்ட் தொடரை இந்திய அணி 2-1 என வென்றுள்ளது. ஆமதாபாத்தில் நடைபெற்ற கடைசி டெஸ் டிரா ஆனது. ஆமதாபாத் டெஸ்டில் சதமடித்த விராட் கோலி, ஆட்ட நாயகனாகத் தேர்வானார். அஸ்வின், ஜடேஜா ஆகிய இருவருக்கும் தொடர் நாயகன் விருது பகிர்ந்தளிக்கப்பட்டுள்ளது. டெஸ்ட் தொடரில் 25 விக்கெட்டுகள் எடுத்த அஸ்வின், ஐசிசி டெஸ்ட் பந்துவீச்சாளர்களுக்கான தரவரிசையில் முதலிடத்தைத் தக்கவைத்துக் கொண்டுள்ளார். 

இந்நிலையில் தமிழக இளைஞா் நலன் மற்றும் விளையாட்டு மேம்பாட்டுத்துறை அமைச்சா்  உதயநிதி ஸ்டாலின், ட்விட்டரில் அஸ்வினைப் பாராட்டி எழுதியதாவது:

தமிழ்நாட்டின் பெருமைக்குரிய அஸ்வின், டெஸ்ட் கிரிக்கெட்டில் நெ.1 பந்துவீச்சாளராகி நமக்குப் பெருமை சேர்த்துள்ளார். தகுதிக்குரிய மரியாதை. இந்திய கிரிக்கெட்டுக்கு அவர் அளித்த பங்களிப்பை இது வெளிப்படுத்துகிறது. சிறப்புமிக்க அவருடைய கிரிக்கெட் வாழ்க்கையில் இன்னும் பல பெருமைகள் தேடி வரும் என்று கூறியுள்ளார்.