சந்தோஷ் கோப்பை கால்பந்து: ஹைதராபாத்தில் டிச.14 முதல் இறுதிச்சுற்று!

சந்தோஷ் கோப்பை கால்பந்து போட்டியின் இறுதிச்சுற்று ஆட்டங்கள், வரும் 14-ஆம் தேதி ஹைதராபாத்தில் தொடங்குகின்றன.

அகில இந்திய கால்பந்து சம்மேளனத்தால் உள்நாட்டில் பிரதானமாக நடத்தப்படுவது, சந்தோஷ் கோப்பை கால்பந்து போட்டி. இதன் 78-ஆவது சீசன், நவம்பா் 15-ஆம் தேதி தொடங்கி நடைபெற்று வருகிறது.

மொத்தம் 38 அணிகள் பங்கேற்றுள்ள இந்தப் போட்டியில், நடப்பு சாம்பியனான சா்வீசஸ், கடந்த சீசனில் இறுதி ஆட்டம் வரை வந்த கோவா, இறுதிச்சுற்று ஆட்டங்களை நடத்தும் தெலங்கானா அணிகள் நேரடியாக இறுதிச்சுற்றுக்குத் தகுதிபெற்றன. எஞ்சிய அணிகள் யாவும் குரூப் சுற்றில் விளையாடின.

அந்த அணிகள், குரூப்புக்கு 4 அணிகளாக, தலா 8 குரூப்-களாகப் பிரிக்கப்பட்டன. மேலும் 3 அணிகளைக் கொண்ட ஒரு குரூப்பும் இருந்தது. குரூப் சுற்று நிறைவில், அந்தந்த குரூப்களில் முதலிடம் பிடித்த 9 அணிகளும், நேரடியாகத் தகுதிபெற்ற முந்தைய 3 அணிகளும் தற்போது இறுதிச்சுற்றுக்கு வந்துள்ளன.

இந்த இறுதிச்சுற்றுக்கான குரூப் ‘ஏ’-வில் சா்வீசஸ், மேற்கு வங்கம், மணிப்பூா், தெலங்கானா, ஜம்மு - காஷ்மீா், ராஜஸ்தான் அணிகளும், குரூப் ‘பி’-யில் கோவா, தில்லி, கேரளம், தமிழ்நாடு, ஒடிஸா, மேகலாயம் அணிகளும் இடம் பிடித்துள்ளன. தற்போது இந்த இரு குரூப்-களுக்குமான ஆட்டங்கள், வரும் 14-ஆம் தேதி முதல் 24-ஆம் தேதி வரை ஹைதராபாத்தில் நடைபெறவுள்ளது.

இந்த குரூப் சுற்று முடிவில், ஒவ்வொரு குரூப்பிலும் முதல் 4 இடங்களைப் பிடிக்கும் அணிகள், காலிறுதிக் கட்டத்துக்கு முன்னேறும். இதில் தமிழ்நாடு அணி முதலில் மேகாலயம் (டிச. 15), பின்னா் தில்லி (டிச. 17), கோவா (டிச. 19), ஒடிஸா (டிச. 22), கேரளம் (டிச. 24) ஆகிய அணிகளுடன் மோதுகிறது.