டாஸில் தோற்றாலும் போட்டிகளில் வெல்கிறோம்: கேகேஆர் கேப்டன்

டாஸில் தோற்றாலும் போட்டிகளில் வெற்றி பெறுவதாக கொல்கத்தா நைட் ரைடர்ஸ் அணியின் கேப்டன் ஸ்ரேயாஸ் ஐயர் தெரிவித்துள்ளார்.

ஐபிஎல் தொடரில் லக்னௌவில் நடைபெற்ற நேற்றைய ஆட்டத்தில் கொல்கத்தா நைட் ரைடர்ஸ் மற்றும் லக்னௌ சூப்பர் ஜெயண்ட்ஸ் அணிகள் மோதின. இந்தப் போட்டியில் கொல்கத்தா நைட் ரைடர்ஸ் 98 ரன்கள் வித்தியாசத்தில் லக்னௌவை வீழ்த்தியது. இதன்மூலம், புள்ளிப்பட்டியலிலும் முதலிடத்துக்கு முன்னேறியது.

கொல்கத்தா நைட் ரைடர்ஸ் அணி இதுவரை 11 போட்டிகளில் விளையாடியுள்ளது. இந்த 11 போட்டிகளில் 8 போட்டிகளில் கொல்கத்தாவுக்கு சாதகமாக டாஸ் அமையவில்லை. இருப்பினும், அந்த அணி விளையாடிய 11 போட்டிகளில் 8 போட்டிகளில் வெற்றி பெற்று புள்ளிப்பட்டியலில் முதலிடத்தில் உள்ளது.

இந்த நிலையில், டாஸில் தோற்றாலும் போட்டிகளில் வெற்றி பெறுவதாக கொல்கத்தா நைட் ரைடர்ஸ் அணியின் கேப்டன் ஸ்ரேயாஸ் ஐயர் தெரிவித்துள்ளார்.

இது தொடர்பாக போட்டி நிறைவடைந்த பிறகு அவர் பேசியதாவது: கடந்த 6 போட்டிகளாக கொல்கத்தா அணி வீரர்கள் உடைமாற்றும் அறைக்கு வந்து, என்ன கேப்டன் நாம் தொடர்ந்து டாஸ் தோற்றுக்கொண்டே இருக்கிறோம். ஆனால், போட்டிகளில் வெற்றி பெறுகிறோம். என்ன நடந்து கொண்டிருக்கிறது எனக் கேட்கிறார்கள். பவர் பிளேவில் எங்களுக்கு நல்ல தொடக்கம் கிடைக்கிறது. எங்களது தொடக்க ஆட்டக்காரர்கள் எதிரணிக்கு சவாலளிக்கும் விதமாக விளையாடுகிறார்கள். அணியில் வீரர்களுக்கு இருக்கும் சுதந்திரமே அவர்களை சிறப்பாக விளையாடச் செய்கிறது என்றார்.